तानसेन,९ मङ्सिर- चितवनमा भोलीदेखि सुरु हुने नेकपा एमालेको १० औं केन्द्रिय महाधिवेशनको निम्ति पाल्पाबाट ६ हजार बढी कार्यकर्ता सहभागी हुने भएका छन् ।

नेकपा एमाले जिल्ला कमिटी पाल्पाका अनुसार जिल्लाका दश वटै पालिकामा गठित नेकपा एमालेको नगरकमिटी गाउँकमिटी तथा वडाकमिटीबाट सवारी साधनको प्रर्वन्ध मिलाएर चितवन जाने व्यवस्था गरिएको हो । जिल्लाबाट साना ठूला गरि एक सय ५० सवारीसाधनमा कार्यकर्ता चितवन जाने नेकपा एमाले जिल्ला अध्यक्ष नारायण आचार्यले बताउनुभयो । पाल्पाबाट ठूला एक सय तथा साना ५० सवारीसाधनमा कार्यकर्ता आज र भोली गरेर चितवन पुग्ने योजना बनाइएको अध्यक्ष आचार्यको भनाइ छ ।

महाधिवेशनका लागी पाल्पा जिल्लाबाट दुई जना मनोनित सहित १७ जना प्रतिनिधी छनौट भएका छन् । पाल्पाबाट केन्द्रिय सदस्य ठाकुर गैरे सचिव पदमा उम्मेदवारी दिने तयारी गर्नुभएको छ । जिल्लाबाट केन्द्रिय सदस्यमा पूर्व भुमीसुधारमन्त्री समेत रहनुभएका दलबहादुर राना, संविधानसभा सदस्य राधाकृष्ण कंडेल, नारायणी शर्मा, धनेन्द्रराज घिमिरे, सृजना काफ्ले तथा लेखा आयोग सदस्यमा झपेन्द्र जिसीले उम्मेदरवारी दिने चर्चा छ ।

नेकपा एमालेको केन्द्रिय महाधिवेशन यही मंसिर १० गतेदेखि १२ गतेसम्म चितवनमा आयोजना गरिएको छ । महाधिवेशनमा देशभरबाट ५ लाख बढी नेता कार्यकर्ता चितवनमा सहभागी हुने एमालेले जनाएको छ ।