वालिङ,५ कात्तिक– गल्याङकी एक महिला एक हप्तादेखि बेपत्ता हुनुभएको छ । गल्याङ नगरपालिका २ घ्याङ्सिङ्डांडाकी ३५ वर्षीया बसन्ती थापा एक हप्तादेखि बेपत्ता हुनुभएको हो ।

बेपत्ता बसन्ती थापाको खोजीका लागि उहाँका श्रीमान चन्द्र बहादुर थापाले वडा प्रहरी कार्यालय वालिङमा निवेदन दिनुभएको छ । एक हप्ता पहिले बिहानको समयमा घरबाट निस्किनुभएकी थापा अहिले सम्म सम्पर्कमा नआएको परिवारले जनाएको छ । थापाले प्रयोग गर्ने मोबाइल समेत घरमै छोडेर गएको र कसैले प्रलोभनमा पारेर बेपत्ता बनाएको हुनसक्ने श्रीमानको भनाइ रहेको छ । विवाह भएको १८ वर्ष भएको र अहिले सम्म आफुहरु बिचमा झैझगडा समेत नभएको चन्द्रबहादुरको भनाइ रहेको छ ।

एक छोरा र दुई छोरीकी आमासमेत रहेकी बसन्ती एक्कासी सम्पर्क विहिन भएपछि परिवार चिन्तित बनेको छ । बसन्ती थापाको खोजी कार्य भइरहेको वडा प्रहरी कार्यालय वालिङले जनाएको छ ।