स्याङ्जा,६ असोज– लामो समय नेपाली कांग्रेसको राजनीतिमा सकृय रहदै आउँनुभएका नेपाली कांग्रेसका नेता कुलबहादुर गुरुङ नेकपा एमालेमा प्रवेश गर्नुभएको छ ।

वालिङ नगरपालिका वडा नम्बर १२ कोखेका सरल अनि शान्त स्वभावका गुरुङ मंगलबार नेकपा एमाले वालिङ नगर कमिटी द्वारा आयोजित बृहत कार्यकर्ता भेलामा एमाले प्रवेश गर्नुभएको हो । उहाँलाई नेकपा एमाले स्थायी कमिटी सदस्य एवं पूर्व उपप्रधानमन्त्री टोपबहादुर रायमाझीले पार्टीमा प्रवेश गराउनुभएको हो ।
तत्कालिन सिर्सेकोट गाविस हुदादेखि नै लामो समय सम्म नेपाली कांग्रेसको पार्र्टी सभापतिको रुपमा रहदै आउनुभएका कांग्रेसका विश्वासिला नेताको रुपमा पहिचान बनाउनुभएका गुरुङ एमाले प्रवेश गरे संगै नेपाली कांग्रेसलाई धक्का लागेको छ ।

२०२६ सालमाबाट विद्यार्थी राजनीतिबाट नेपाली कांग्रेसमा सकृय रुपमा लाग्दै आउँनुभएका गुरुङ कांग्रेसको आसन्न १४ औं महाधिवेशनका लागि स्याङ्जा निर्वाचन क्षेत्र नम्बर २ का लागि क्षेत्रिय प्रतिनिधि समेत हुनुहुन्थ्यो । वालिङ नगरपालिका १२ कोखेलाई कांग्रेसमुक्त बनाउन आफू एमाले प्रवेश गरेको गुरुङले बताउनुभयो । उहाँले भन्नुभयो, “गाउँको विकासको लागि एमाले बाहेक अरुको विकल्प देखिएन त्यसैले एमालेमा प्रवेश गरे ।”

एमालेले जिल्लामा अयोजना गरेको पालिका स्तरिय बृहत कार्यक्रता भेला अन्तरगत पुतलीबजार नगरपालिका, चापाकोट, गल्याङ, वालिङ र कालीगण्डकी गाउँपालिकामा आयोजना गरिएको कार्यक्रममा नेपाली कांग्रेस लगायतका दलहरुबाट करिव ५ सय कार्यक्रता एमाले प्रवेश गरेको नेकपा एमाले स्याङ्जाका अध्यक्ष सूर्य प्रसाद गैह्रे (पारस)ले जानकारी दिनुभयो ।