वालिङ,१० भदौ– प्रहरीले कर्तव्य ज्यान मुद्धामा फरार रहेका जेष्ठ नागरिकलाई पक्राउ गरेको छ । पुतलीबजार नगरपालिका १४ (साविक चण्डिकालीका गाविस ५) का ७५ वर्षीय यामप्रसाद पौडेललाई प्रहरीले पोखराबाट पक्राउ गरेको हो । पोखरामा लुकिछिपी बसेको भन्ने गोप्य सूचनाको आधारमा पौडेललाई पक्राउ गरिएको प्रहरीले जनाएको छ ।

कर्तव्य ज्यान मुद्धामा २०५४ साल कात्तिक ४ गते जिल्ला अदालत स्याङ्जाबाट १९ वर्ष ६ महिना १२ दिन कैद सजाय तोकेको थियो । अदालतले सजाय तोके पनि फरार रहेका पौडेललाई प्रहरीले बुधबार पोखराबाट पक्राउ गरेको थियो । पक्राउ पर्नुभएका पौडेललाई जिल्ला अदालतमा पेश गरेर कैद भुक्तानको लागि कारागार चलान गरिएको जिल्ला प्रहरी कार्यालय स्याङ्जाका प्रहरी नायव उपरीक्षक राजेन्द्रप्रसाद अधिकारीले जानकारी दिनुभयो ।