कठमाडौं,९ भदौ– निर्वाचन आयोगले नेकपा (एकीकृत समाजवादी) र लोकतान्त्रिक समाजवादी पार्टीलाई मान्यता दिएको छ । आज दिउँसो दुवै दललाई सनाखतको लागि बोलाएको निर्वाचन आयोगले दल दर्ताको सम्पुर्ण प्रकृया पुरा गरेर आजै दर्ता प्रमाणपत्र दिएको छ ।

आयोगले बोलाएपछि दिउसो दुई दलका नेताहरु आयोगमा पुगेर आआफ्नो दल दर्तामा सनाखत गरेका थिए । आयोगले दल दर्ताको प्रमाणपत्र दिए संगै नेकपा एमालेबाट छुट्टिएको नेता माधवकुमार नेपालको नेतृत्वमा नेकपा (एकीकृत समाजवादी) र जनता समाजवादीबाट छुट्टिएको नेता महन्थ ठाकुरको नेतृत्वमा गरी दुई दल निर्वाचन आयोगमा दर्ता भए संगै छुट्टा छुट्टै दलिय मान्यता पाएका छन् । नयाँ दल दर्ताका लागि पूर्व प्रधानमन्त्री नेपाल र ठाकुर लगायतले दिनुभएको निवेदनमा आयोगले आजै सनाखत गरेको थियो ।