काठमाडौं,९ भदौ– नेकपा (एमाले) का अध्यक्ष तथा पूर्व प्रधानमन्त्री केपी शर्मा ओलीले एमाले फुटाउने गरी गलत नियतसाथ सरकारले अध्यादेश ल्याएको बताउनुभएको छ । यसले मुलुकको राजनीतिमा दूरगामी असर पार्ने समेत अध्यक्ष ओलीले बताउनुभयो ।

स्थायी कमिटीको मङ्गलबार बसेको बैठकको निर्णयबारे जानकारी गराउन आयोजित पत्रकार सम्मेलनमा बोल्नुहुँदै अध्यक्ष ओलीले सो कुरा बताउनुभयो । एमाले राष्ट्रिय राजनीतिको मूल प्रवाह भएकाले देशको समुन्नति र प्रगति गर्ने पनि एमालेकै काँधमा रहेको बताउनुभयो ।

अध्यादेश ल्याउनु संवैधानिक व्यवस्था भए पनि त्यो देश र जनताका लागि हुनुपर्ने अध्यक्ष ओलीले बताउनुभयो । अहिले अध्यादेश जारी गर्नुपर्ने कुनै आवश्यकता नभएका बेला एमाले फुटाउनकै लागि मात्र अध्यादेश ल्याइएको उहाँले टिप्पणी गर्नुभयो । आफू प्रधानमन्त्री भएका बेला पनि अध्यादेश आए पनि त्यसबेला र अहिलेको  स्थिति फरक रहेकाे बताउनुभयाे ।

एमाले सचिव तथा प्रवक्ता प्रदीप ज्ञवालीले हानिकारक बाटो छाडी पार्टीको मूल प्रवाहमा आउन नेता माधवकुमार नेपाल पक्षलाई आग्रह गर्नुभयो । प्रमुख प्रतिपक्षी दललाई जसरी पनि विभाजन गर्नेगरी सरकारले अध्यादेश ल्याएकोप्रति टिप्पणी गर्नुहुँदै उहाँले भन्नुभयो, “यो अध्यादेशको दूरगामी असर नेपाली राजनीतिमा पर्नेछ । लोकतान्त्रिक व्यवस्थाको बर्खिलापमा छ ।” पार्टी परित्याग गरेका सांसदहरुको नाम अहिलेसम्म  टाँस नगर्नुभएको गलत भएको उहाँले बताउनुभयो । सरकारको गलत कामकाजको रचनात्मक विरोध गर्नु प्रमुख प्रतिपक्षी दलको कर्तव्य भएकाले त्यसको खवरदारी जारी रहने बताउनुभयो ।

एमालेका सचिव योगेश भट्टराईले नेपाली दल विभाजनले प्रतिक्रान्ति शक्तिहरु सल्बलाउन थालेको बताउनुभयो । पार्टी विभाजनले कसैलाई फाइदा नपुग्ने भन्दै एकताबद्ध हुन पार्टी पङ्क्तिलाई आग्रह गर्नुभयो ।