स्याङ्जा,४ भदौ– पुतलीबजार नगरपालिकाले कर्मचारीहरुलाई क्षमता तालिम सञ्चालन गरेको छ । तालिममा नगर भित्र रहेका १४ वटै वडाका सचिवहरु, सहायक सचिवहरु र पालिकामा रहेका सहायक स्तरका कर्मचारीहरुको सहभागिता रहेको छ । कर्मचारीको क्षमता विकास गर्ने उद्देश्यले नगरपालिकाले ७ दिने सञ्चालन गरेको हो ।

तालिमको उद्घाटन गर्दै पुतलीबजार नगरपालिका प्रमुख सीमाकुमारी क्षेत्रीले कर्मचारी सक्षम भए मात्रै नगरपालिकाको काम राम्रो संग सञ्चालन हुने र काम राम्रो भएपछि नगरपालिका र कर्मचारी प्रति सबैको सम्मान बढ्ने भएकोले कर्मचारीहरु आआफ्नो क्षेत्रमा सक्षम हुनुपर्ने बताउनुभयो ।

नगरपालिकाका काम लाई थप प्रभावकारी बनाउन तालिमको आयोजना गरिएको बताउदै नगरप्रमुख क्षेत्रीले तालिममा सिकेका कुराहरुलाई व्यवहारमा उतार्न समेत आग्रह गर्नुभयो । अहिलेको समय भनेको प्रविधीको भएकोले प्रविधीका बारेमा सबै कर्मचारीहरु जानकार रहनुपर्ने नगरप्रमुख क्षेत्रीको भनाइ थियो ।

तालिमको उद्घान समारोहमा नगर उपप्रमुख महेश पुरी, प्रमुख प्रशासकीय अधिकृत पुरुषोत्तम शर्मा, शिक्षा शाखा प्रमुख बाबुराम बराल लगायतले आआफ्नो भनाइ राख्नुभएको थियो । ७ दिन सम्म सञ्चालन हुने तालिममा कम्प्युटर, सूचना प्रविधी, व्यक्तीगत घटनाको अनलाइन दर्ता, सामाजिक सुरक्षा भत्ताको अनलाइन दर्ता तथा नविकरण, विभिन्न कार्यालयहरुमा गरिने सिफारीस र सम्बन्धीत ऐन नियमका बारेमा कक्षा सञ्चालन हुने योजना प्रशासन अनुगमन अधिकृत ताराचन्द्र ढकालले जानकारी दिनुभयो ।