वालिङ,२ भदौ– भीरकोट साना किसान सहकारी संस्थाले कुखुराका चल्ला वितरण गरेको छ । सहकारीले आफ्ना शेयर सदस्यहरुलाई आत्मनिर्भर बनाउने उद्देश्यले लोकल कुखराका चल्ला वितरण गरेको हो ।

चाडबाढमा प्रयोग गर्न मिल्ने गरी कुखुराका चल्ला वितरण गरिएको सहकारीका अध्यक्ष विश्वनाथ अर्यालले बताउनुभयो । करीब ६ हजार चल्ला निशुल्क वितरण गरिएको सहकारीले जनाएको छ । सहकारीद्वारा वितरण गरिएका चल्लाले निम्न आर्थिक अवस्था भएका किसानहरुलाई आयआर्जमा सहयोग पुग्ने अध्यक्ष अर्यालको भनाइ रहेको छ ।

यसअघि सहकारीले बट्टाई, कालिज, टर्की, बोइलरका साथै लोकल कुखुराका चल्ला वितरण गरेको थियो । सहकारीमा अवद्ध किसानहरुले आयआर्जनमा जोडिनको लागि कुखुरा पालन गर्न चाहेकोले सहकारीले पुन चल्ला वितरण गरेको हो ।

२०७५ सालमा स्थापना भएको भीरकोट साना किसान सहकारी संस्थामा हाल ६ सय बढि शेयर सदस्य रहेकाछन् । निम्न आयस्रोत भएका किसानलाई उत्पादनमूलक क्षेत्रमा लगाउने उदेश्यले सहुलियत दरमा ऋण समेत उपलब्ध गराउँदै आएको सहकारीले जनाएको छ ।