मोहन सुनार
वालिङ,२ भदौ– सरकारले दल बिभाजनको लागि अध्यादेश ल्याएको भन्दै वालिङमा सरकार विरुद्ध विरोध प्रदर्शन गरिएको छ । नेपाल कम्युनिष्ट पार्टी नेकपा एमालेको भात्रृ संगठन अनेरास्ववियु र राष्ट्रिय युवा संघले संयुक्त रुपमा वालिङमा नाराजुलुस सहित विरोध प्रदर्शन गरेको हो ।

सरकारद्वारा जारी दल सम्बन्धी (दोस्रो संशोधन) अध्यादेश २०७८ को विरोधमा प्रदर्शन गरेको हो । राजनीतिक दल सम्बन्धी अध्यादेश खारेज गर, मापसे सरकार मुर्दावाद, सुकुम्बासी रोएको छ । देउवा सरकार कहाँ छ, लगायतका प्लेकार्ड सहितको जुलुशले वालिङको मुख्य बजारको चोकमा कोणसभा गरेको हो ।

वालिङ मोडमा भएको प्रदर्शनमा अनेरास्ववियुका केन्द्रिय सगुन रानाले अदालतको आदेशमा बनेको सरकारले नागरिकको बाँच्न पाउने अधिकार खोसेको आरोप लगाउनुभयो । उहाँले ओली नेतृत्वको सरकारलाई अदालतको निर्णयमा षड्यन्त्रपूर्वक पाखा लगाइएको आरोप लगाउँदै सुकुम्बासी आयोग खारेज गरेर भूमिहिनहरुको बास खोसेकोमा आपत्ति जनाउनुभयो ।

बुधबार भएको प्रदर्शन तथा कोणसभामा राष्ट्रिय युवा संघ,वालिङ नगर कमिटिका अध्यक्ष विवेक पराजुलीले देउवा नेतृत्वको सरकार व्यक्तिगत र दलिय स्वार्थमा डुबेको आरोप लगाउनुभयो । उहाँले अफगानिस्तानमा अलपत्र परेका नेपालीहरुको तत्काल उद्धार गर्न सरकार असफल भएको समेत बताउनुभयो ।
अध्यक्ष पराजुलीले व्यक्तिगत स्वार्थको लालसाका कारण सरकारले मन्त्रीमण्डल विस्तार गर्न नसकेको आरोप लगाउँदै देशलाई अस्थिरतातर्फ धकेलेकोले सरकार नागरिक प्रति अनुत्तरदायी बनेको बताउनुभयो । यसै गरी सरकारले ल्याएको अध्यादेश विरुद्ध एमाले निकट भात्रृ संगठनले देशैभर प्रदर्शन गरेकाछन् ।