काठमाडौ,१८ साउन– राष्ट्रियसभामा विपक्षी दलका सांसदहरुले दार्चुला घटनाबारे भारतसँग छलफल गर्न किन डराएको ? भनी गृहमन्त्री बालकृष्ण खाँणलाई प्रश्न गरेका छन् ।

गृहमन्त्री खाँणले विशेष समय लिएर राखेको धारणाबारे प्रश्नोत्तरमा सहभागि हुँदै नेकपा एमालेका सांसदहरुले भारतीय एसएसबीले तुइन काटेर नेपाली युवाको हत्या गरेकोमा सरकार किन मौन रहेको भनी प्रश्न गरेका हुन् ।
‘सरकारले समितिमात्रै बनाएर बस्न मिल्छ कि हिम्मत गरेर भारतसँग कुरा गर्छ ? कि सरकारले यसलाई कम्फर्टेबल बनाउन खोजेको हो ?’ राष्ट्रियसभा सदस्य कोमल वलीले प्रश्न गर्नुभयो । त्यस्तै सांसद भैरवसुन्दर श्रेष्ठले जयसिंह धामीको मृत्युबारे भारतसँग सरकारले किन कुरा नगरेको भनी प्रश्न गर्नुभएको थियो ।
सांसद डा. विमला राई पौडेलले तुइन विस्थापनमा भारतीय असहयोगलाई सरकारले कसरी सामना गर्छ भनी प्रश्न सोधनुभएको छ ।