कला राना
स्याङ्जा,४ असार– स्याङ्जामा कोरोना भाईरस सक्रिय संक्रमितको संख्या घटेको छ । शुक्रबार ४ सय २८ जना निको हुँदा जिल्लामा सक्रिय संक्रमितको संख्या ३ सय ९७ मा झरेको हो । बिहीबार सक्रिय संक्रमितको संख्या ८ सय ०९ जना रहेको थियो । शुक्रबार ४ सय २८ जना निको हुँदा सक्रिय संक्रमित घटेका हुन् ।
सक्रिय संक्रमितहरु मध्ये ३ सय ६५ जना होम आइसोलेसनमा छन् भने आइसोलेसन सेन्टरमा २३ जना र ९ जना विभिन्न स्वास्थ्य संस्थामा सामान्य अवस्थामा उपचाररत रहेको जिल्ला स्वास्थ्य कार्यालयका निमित्त प्रमुख विष्णुप्रसाद सुवेदीले बताउनुभयो ।
जिल्लामा कोरोनाको दोस्रो लहरबाट ३ हजार ३२ जना संक्रमित भएका छन् । कुल संक्रमित मध्ये २ हजार ५४१ जना निको भएका छन् भने ९४ जना संक्रमितको निधन भएको स्वास्थ्य कार्यालयले जनाएको छ । यसैबीच शुक्रबार जिल्लामा १७ जनामा संक्रमण पुष्टी भएको छ । ३ जनाको पिसिआर परीक्षण गर्दा १ जना र ६२ जनाको एन्टिजेन परीक्षण गर्दा १६ जना गरी १७ जनामा संक्रमण पुष्टी भएको हो । जिल्लामा २१ हजार २ सय ९९ जनाले कोरोना विरुद्धको पहिलो खोप लगाएका छन् भने ४ हजार १ सय ९६ जनाले दोस्रो मात्राको खोप लगाएका छन् ।