स्याङ्जा,१० फागुन–कृषि तथा पशुपंक्षी विकास मन्त्री पद्माकुमारी अर्यालले ओली सरकारले गरेको विकास निर्माणका कामहरु आफ्नै गाउँठाउँमा हेर्न आग्रह गर्नुभएको छ । ओली सरकारले केही गरेन भन्नेहरुलाई लक्षित गर्दै मन्त्री अर्यालले सोमबार गृहजिल्ला स्याङ्जामा सो कुरा बताउनुभएको हो ।
स्याङ्जा र पाल्पा जोड्ने मोटरेबल पुलको शिलन्यास गर्दै मन्त्री अर्यालले विकास हेर्न टाढा जान नपर्ने बताउनुभयो । मन्त्री अर्यालले भन्नुभयो, ‘यो तीन वर्षमा विकास कति भयो आँफै उभिएको ठाउँमा हेर्नुस् । नेपालका ७५३ स्थानीय तहहरुमा विकासको गति विगत भन्दा तिब्र गतिमा अगाडि बढेको छ ।’ दिनलाई रात बनाउन दुश्साहस गर्नेहरुले सरकारले गरेको विकासको गति हेर्न सक्नुपर्ने उहाँले बताउनुभयो ।
‘हरेक पालिकामा बृहत् खानेपानी योजना सुरु भएका छन् । यहि सरकारको कार्यकालमा देशका ३९६ स्वास्थ्य केन्द्रहरुको शिलन्यास भएका छन् ति मध्ये केही सकिए केही निर्माणाधिन अवस्थामा छन्’ के यी काम होइनन् ? मन्त्री अर्यालको प्रश्न थियो ।
सहज स्वस्थ्य सेवा जनताको पहुँचमा पु¥याउन होस् वा स्वच्छ खानेपानी घर–घरमा पु¥याउने कार्यमा होस् सरकार जनतासँग प्रत्यक्ष जोडिएको उहाँको भनाई थियो ।
स्याङ्जाको कालीगण्डकी गाउँपालिका र पाल्पाको बगनासकाली गाउँपालिका दरपुक जोड्ने कालीगण्डकी नदीमा मोटरेबल पुलको शिलन्यास गर्दै मन्त्री अर्यालले पुल निर्माण कार्य सम्पन्न भएपछि यस भेगका जनतालाई यात्रा गर्न निकै सहज हुने मन्त्री अर्यालको भनाइ थियो ।

२०७७ भदौ १ गते सम्झौता गरिएको मोटरेबल पुल सम्झौताको ३३ महिनामा सक्नुपर्ने समयसीमा रहेको छ । गौरी पार्वती न्यू टेक्निकल जेभि कुपनडोलले निर्माणको जिम्मा लिएको पुल पिएस र भ्याट सहित १५ करोड ३९ लाख २८ हजार ६७९ रुपैँया ५० पैसामा सम्झौता भएको हो । १.७५ दयाँबायाँ फुटपाथ रहने पुल ११ मिटरको चौडाई रहने छ । १२० मिटर लम्बाईको पुल २ स्पान रहने सडक डिभिजन कार्यालय पाल्पाका प्रमुख भिमअर्जुन कंडेलले जानकारी दिनुभयो । ओपन फाउण्डेसनमा बन्ने पुल योजना पश्चिम क्षेत्र सेक्टर नम्बर चार पाल्पाले हेर्नेछ ।