गल्याङ, २७ पुस– गल्याङ नगरपालिका ३ बल्पुकमा रहेको नगर अस्पतालमा सोमबार देखि निशुल्क स्वास्थ्य परिक्षण शिविर सुरु भएको छ । गल्याङ नगरपालिका अन्तरगत रहेको नगर अस्पतालको आयोजनामा निशुल्क स्वास्थ्य परिक्षण शिविर सञ्चालन भएको हो । दुई दिन सम्म चल्ने शिविरको पहिलो दिन आज महिला तथा स्त्रि रोग सम्बन्धी समस्या भएका विरामीहरुले निशुल्क स्वास्थ्य परिक्षण गराएका छन् । शिविरमा दुई सय १३ जना महिलाहरुले निशुल्क स्वास्थ्य परिक्षण गराएको अस्पतालले जनाएको छ ।
लुम्बीनी मेडिकल कलेज प्रवास पाल्पाका बरिष्ठ महिला तथा स्त्री रोग विशेषज्ञहरुको टोली द्वारा महिलाहरुको रोगको स्वास्थ्य परिक्षण गरीएको छ । सोमबार शिबिरमा सहभागी हुन टाढाबाट आउने विरामीहरुका लागि नगरपालिकाले सवारीसाधनको निशुल्क व्यवस्था समेत गरेको थियो ।

शिविरको उद्घाटन कार्यक्रममा गल्याङ नगरपालिका प्रमुख भुपराज अधिकारीले सबै नगरवासीको पहुँचमा निशुल्क स्वास्थ्य पु¥याउने बताउनुभयो । उहाँले घर घरका सबै नागरिकलाई स्वस्थ बनाउनका लागि नगरपालिकाले विशेष अभियान चाल्ने बताउनुभयो ।
विरामी भएपछि उपचार गर्नुभन्दा रोग नै लाग्न नदिनु राम्रो भएको भन्दै उहाँले त्यसका लागि अर्गानिक खानामा जोड दिनुपर्ने बताउनुभयो । घर घरमा अर्गानिक खाना र तरकारी उत्पादन गरी कम्तिमा आफुलाई मात्रै पु¥याउन सकेमा पनि विषादीयुक्त खान नपर्ने र यसले स्वस्थ रहन महत्वपूर्ण सहयोग पुग्ने उहाँको भनाई छ ।
कार्यक्रममा अस्पतालका प्रमुख व्यवस्थापक थानापति न्यौपानेले नगर अस्पतालले सधैं सस्तो शुल्कमा अधिकतम स्वास्थ्य सेवा दिन प्रयत्नशिल रहेको बताउनुभयो । मंगलबार लुम्बीनी मेडिकल कलेज प्रवास पाल्पाका बरिष्ठ मानसिक रोग विशेषज्ञ चिकित्सकहरुको टोलीले मन डराउने, निद्रा नलाग्ने लगायतका मानसिक समस्या भएका विरामीहरुका लागि निशुल्क स्वास्थ्य परिक्षण गर्ने अस्पतालले जनाएको छ । निशुल्क स्वास्थ्य परिक्षण शिविरमा सहभागी भएर मौकाको फाइदालिन अस्पतालले सबै नगरवासीमा अनुरोध समेत गरेको छ ।