स्याङ्जा, २६ पुुस– लियो क्लब अफ वालिङ सिटीको आयोजनामा खुल्ला पुरुष बि एण्ड सि क्याटागोरि ब्याडमिण्टन प्रतियोगिता वालिङस्थित कभर्डमा सम्पन्न भएको छ । वालिङ, भीरकोट र चापाकोट नगरपालिकाको सहयोगमा लायन्स क्लब अफ वालिङ सिटीको समन्वयमा आयोजित प्रथम लियो वालिङ ब्याडमिण्टन कप डबल ब्याडमिण्टन प्रतियोगिता २०२० र २१ को समापन कार्यक्रममा बोल्दै वालिङ नगरपालिका प्रमुख दिलिपप्रताप खाँणले खेलले युवाहरुलाई सकरात्मक उर्जा प्रदान गर्ने बताउनुभयो ।
उहाँले खेल क्षेत्र तथा खेलाडीहरुको विकासका नगरपालिका सँधै सकरात्मक रहेकाले खेलाडीहरुलाई स्थापित गर्ने कार्यक्रमहरु समेत ल्याउने बताउनुभयो । संस्थाका अध्यक्ष लियो दिक्षान्त खाँणको सभापतित्वमा सम्पन्न भएको कार्यक्रमको सञ्चालन सचिव लियो हरि रेग्मीले गर्नुभएको थियो भने कार्यक्रमको संयोजक लियो शिव हिताङले गर्नुभएको थियो ।
प्रतियोगितामा बि क्याटागोरी तर्फ बुटवलका सुमितकुमार घिमिरे र खड्कबहादुर आले प्रथम हुनुभएको छ भने वालिङका प्रकाश सुवेदी र विष्णु गुरुङ द्वितीय हुनुभएको छ । त्यस्तै सि क्याटागोरी तर्फ लियो शिव हिताङ र अनिल हिताङ प्रथम र ओम गुरुङ र पात्ते गुरुङ द्वितीय हुनुभएको छ ।
दुवै क्याटागोरीका प्रथम, द्वितीय हुने खेलाडीले क्रमश रु. २० हजार र १० हजार नगद सहित ट्रर्फी, मेडल र प्रमाणपत्र प्रदान गरिएको छ भने उत्कृष्ट खेलाडी घोषणा हुनुभएका बुटवलका सुमन थापाले ट्रर्फी, मेडल र प्रमाणपत्र प्राप्त गर्नुभएको छ । प्रतियोगितामा स्याङ्जा सहित गुल्मी, पाल्पा, कास्की र रुपन्देही गरि ५० समुहको सहभागिता रहेको थियो ।