गल्याङ, ४ पुस– गल्याङ नगरपालिका प्रमुख भुपराज अधिकारीले नगरपालिका भित्र उत्पादित कृषि उपजको विकृवितरण जिम्मा नगरपालिकाले लिने बताउनुभएको छ । गल्याङ नगरपालिका ५ सेतीवेणीमा शनिबार भएको निमुवाखर्क बहुउद्देश्यीय सहकारी संस्था लिमिटेडको १२ औं वार्षिक उत्सव तथा साधारणसभाको उद्घाटन कार्यक्रममा बोल्दै नगरप्रमुख अधिकारीले किसानले उत्पादान गरेका कृषि उपज फाल्नुपर्ने अवस्था आउनदिने बताउनुभयो ।

नगरप्रमुख अधिकारीले भन्नुभयो, ‘सबै बजेट कटाएर भए पनि कृषकको उत्पादन नगरपालिका आफैले व्यवस्थापन गर्नेछ । तपाईहरु ढुक्कले उत्पादनमा लाग्नुहोस् ।’ उहाँले सेतीवेणी, मोहनडाँडा, निबुवा हुँदै गल्याङ आउने बाटो कृषकहरुले दुध र तरकारी उत्पादन गर्न सकेमा दैनिक रुपमा गल्याङमा ढुवानी गर्न नगरपालिकाले सवारीसाधनको व्यवस्थापन गर्ने बताउनुभयो । उहाँले दैनिक पाँच सय लिटर दुध उत्पादन गर्ने योजना बनाएर लाग्न संस्थालाई आग्रह गर्नुभयो । दुग्ध विकास संस्थानले तोकेको दर रेटमा प्रतिलिटर १५ रुपैयाँको अनुदानको व्यवस्थालाई सदुपयोग गर्न नगरप्रमुख अधिकारीले आग्रह गर्नुभयो ।
किसानमा उत्साह आए मात्रै विकास सम्भव हुने भएकाले आफुले कृषिलाई विशेष प्राथमिकतामा राखेको उहाँको भनाई छ ।

नगरप्रमुख अधिकारीले सेतिवेणी शिलामा सञ्चालित गुरुकुलका लागि तत्काल एक लाख रुपैयाँ अनुदानको व्यवस्था गर्ने र बाँकी आवश्यक सहयोग पनि गर्दै जाने प्रतिबद्वता जनाउनुभयो ।
कार्यक्रममा गल्याङ नगरपालिका ५ का अध्यक्ष विष्णुबहादुर क्षेत्री बस्यालले स्थानीय जनताको विकासका कार्यमा वडा लागिरहेको बताउनुभयो ।