गल्याङमा खेलकुद कलेज

गण्डकी समाचार २०७७ पुष ३ गते, शुक्रबार

केपी खनाल
गल्याङ,३ पुस– गल्याङ नगरपालिकामा खेलकुद कलेजको स्थापना गरिने भएको छ । शुक्रबार गल्याङमा आयोजित एक कार्यक्रममा नगरप्रमुख भुपराज अधिकारीले गल्याङमा खेलकुद कलेजको स्थापनाको तयारी भैरहेको बताउनुभएको बताउनुभएको हो ।
नगरप्रमुख अधिकारीले स्वस्थ र स्फुर्तीका साथै सकारात्मक सोचका लागि खेलकुद अपरिहार्य रहेको भन्दै यसका लागि नगरपालिकाले खेलकुद कलेज स्थापना गर्ने तयारी गरेको स्पष्ट पार्नुभयो ।
‘स्वास्थ्यका लागि खेलकुद, राष्ट्रका लागि खेलकुद’ भन्ने नाराका साथ गल्याङ नगरपालिका ३ तल्लो गल्याङमा जापान कराँते डो आँसिकाई संघ जिल्ला कार्यसमिति स्याङ्जाले गरेको ग्रेडिङ कार्यक्रम तथा पेटी परीक्षामा नगरप्रमुख अधिकारीले सबै बालबालिकालाई खेलकुदमा संलग्न हुने अवसर प्रदान गर्नुपर्नेमा जोड दिनुभयो ।

उहाँले भन्नुभयो, ‘प्रत्येक विद्यालयमा बाल क्लब गठन गरि खेलकुद, शिक्षा र स्वास्थ्यमा जोड्ने दिने नगरपालिकाले अभियान चालिरहेको छ ।’ नगरप्रमुख अधिकारीले खेलकुदले मानिसलाई स्वस्थ बनाउन सहयोग गर्ने भएकाले यस कार्यका लागि नगरपालिकाले सबै खालको सहयोग गर्ने प्रतिबद्वता समेत जनाउनुभयो ।

कार्यक्रममा जापान कराँते डो आँसिकाई संघका केन्द्रीय महासचिव ओमकृष्ण प्रसाईले स्वस्थ र फुर्तिलो बनाउन मात्र नभई दुव्र्यसनीबाट बचाउन, मोवाइल जस्ता आधुनिक प्रविधिमा बढि केन्द्रीत हुन एवं सकारात्मक सोचका लागि खेलकुदको आवश्यकता रहेको बताउनुभयो ।

प्रसाईले गहना नलगाउँदा पनि फरक नपर्ने भएकाले खेलाडीलाई राष्ट्रको गहना मात्रै भन्न नहुने बताउनुभयो ।
कार्यक्रममा नेपाल कम्युनिष्ट पार्टी (नेकपा)का नगर कमिटी अध्यक्ष नारायणप्रसाद अधिकारीले खेलकुदको विकासमा स्थानीय सरकारले पनि विशेष ध्यान दिनुपर्ने बताउनुभयो ।