काठमाडौं, २८ मंसिर, आगामी महिनादेखि विदेशमा जागिर खाएर पेन्सन लिएर बस्ने नेपाली नागरिकहरुले पनि वृद्ध भत्ता पाउने भएका छन् । सरकारले सामाजिक सुरक्षा ऐन, २०७५ लाई अध्यादेश मार्फत् संशोधन गरी विदेशमा काम गरेको आधारमा पेन्सन बुझ्दै आएका नेपालीहरुलाई पनि बृद्ध भत्ता दिने व्यवस्था गरेको हो ।
२०७५ अघि सामाजिक सुरक्षा ऐनमा विदेशमा जागिर खाएका पेन्सन प्राप्त नेपालीहरुले पनि पेन्सन पाउने व्यवस्था थियो। तर २०७५ सालमा व्यवस्थापिका संसदले विदेशी पेन्सन प्राप्त व्यक्तिहरुको सामाजिक अवस्था राम्रो हुने भन्दै उनीहरुलाई बृद्ध भत्ता सुविधाबाट हटाएको थियो। अहिले सरकारले पुनः उनीहरुलाई पनि पेन्सन पाउने श्रेणीमा थपेको छ । आफुहरुले पाउदै आएको भत्ता एकाएक कटौती भएपछि विदेशी पेन्सन खाने जेष्ठ नागरिकहरुले राज्यले दिने सेवासुविधा पाउनुपर्ने माग गर्दै आएका थिए ।