वालिङ,१४ साउन– स्याङ्जाको वालिङ नगरपालिका–८ बाँसघारीस्थित आँधीखोला किनारबाट अवैध रूपमा नदीजन्य पदार्थ उत्खनन् तथा ओसारपसारमा संलग्न एक ट्याक्टरलाई प्रहरीले नियन्त्रणमा लिई कारबाही गरेको छ।

बुधबार राति करिब ८ बजे वडा प्रहरी कार्यालय वालिङबाट खटिएको प्रहरी टोलीले आँधीखोला किनारमा अवैध रूपमा बालुवा लोड गरी ओसारपसार गरिरहेको अवस्थामा ग.१ त. ७३३३ नम्बरको ट्याक्टर फेला पारी नियन्त्रणमा लिएकाे जिल्ला प्रहरी कार्यालय स्याङ्जाका प्रहरी नायव उपरीक्षक रमेश दत्त अवस्थीले जानकारी दिनुभयाे।

नियन्त्रणमा लिएको ट्याक्टरलाई आवश्यक अनुसन्धान तथा कानुनी कारबाहीका लागि वालिङ नगरपालिकाको कार्यालय पठाइएको थियो। नगरपालिकाले उक्त ट्याक्टरलाई ३० हजार रुपैयाँ जरिवाना गरी छाडेको जिल्ला प्रहरी कार्यालय स्याङ्जाले जनाएको छ।