वालिङ,२८ असोज– नवौँ राष्ट्रिय खेलकुद प्रतियोगिता अन्तर्गत वालिङ खेलमैदानमा सञ्चालित महिला फुटबल प्रतियोगिताको शुक्रबार ३ खेल भएका छन् ।
विभागीय टीम एपीएफ, गण्डकी प्रदेश विजयी भएका छन् भने तेस्रो खेल बराबरीमा टुंगिएको छ ।
पहिलो खेलमा विभागीय टीम एपीएफले प्रदेश नम्बर १ लाई १ का विरुद्ध ७ गोल गर्दै विजयी भएको हो । एपीएफका लागि सावित्रा भण्डारीले ६ गोल गर्नुभयो भने अनिता केसीले एक गोल गर्नुभएको थियो । प्रदेश नम्बर १ का लागि अन्जना थुलुङ राईले १ गोल गर्नुभयो ।
यसैगरी दोस्रो खेलमा गण्डकी प्रदेशले कर्णाली प्रदेशलाई शुन्यका विरुद्ध ३ गोलले हराएको हो । खेलको ३३ औं मिनेटमा शान्ता नेपालीले सुरुवाती गोल गर्नुभएको थियो । उदया थापाको दुई गोलसहित गण्डकीले शुन्यका विरुद्ध ३ गोल गरी जीत निकाल्न सफल भएको हो ।
खेलको धेरैजसो समय गण्डकीले कर्णाली प्रदेशलाई दवावमै राखेको थियो । गोल गर्ने केही प्रयास गरे पनि गोल गर्न नसक्दा कर्णाली प्रदेश पराजित हुन पुगेको हो । त्यस्तै आजको अन्तिम तथा तेस्रो खेल सुदुरपश्चिम र मधेस प्रदेश बीचको खेल बराबरीमा टुंगिएको हो । खेलको अन्तिम समयसम्म पनि दुवै प्रदेशका खेलाडिले कुनै पनि गोल नगरेपछि खेल गोलरहित टुंगीएको छ ।