बसन्त पराजुली
नारायणगढ,२६ भदौ- भरतपुर महानगरपालिका–९, बसन्तचोकमा इभी कारमा आगलागी हुँदा मृत्यु हुनेमा भरतपुर महानगरपालिका–११ का अमर पराजुली रहेको खुलेको छ ।

जिल्ला प्रहरी कार्यालय चितवनका प्रहरी उपरीक्षक रामेश्वर पौडेलका अनुसार टाँडीबाट भरतपुरस्थित घर फर्कने क्रममा पराजुली सवार कारमा एक्कासि आगलागी भएको थियो ।

कारमा जलेर मृत्यु हुने व्यक्ति पराजुली नै भएको उहाँका परिवारले जानकारी गराएको उहाँले बताउनुभयो । पराजुली बिहीबार बेलुका घरबाट निस्कनुभएको थियो ।

शुक्रबार बिहान करिब ६ बजे बसन्तचोकस्थित पूर्व–पश्चिम राजमार्गको सर्भिस लेनमा पूर्वबाट पश्चिमतर्फ आउँदै गरेको बा.प्र. ०१–०३० च ५५७९ नम्बरको इभी कारमा आगलागी भएको थियो । उक्त कार पराजुलीकै रहेको प्रहरीले जनाएको छ । पराजुली चितवनका शैक्षिक व्यक्तित्व हुनुहुन्छ ।