स्याङ्जा,२४ जेठ- नेपाल पत्रकार महासंघ स्याङ्जाको शाखाकाे १५औं वार्षिक साधारणसभा आँधिखोला गाउँपालिका १ म्हाजुभञ्याङमा शनिबार सम्पन्न भएको छ । 

साधारण सभाको उद्घाटन गर्दै आँधीखोला गाउँपालिका अध्यक्ष विश्व पौडेलले समाजको रूपान्तरण र सुशासनका लागि पत्रकारिता जगतको भूमिका महत्वपूर्ण हुने बताउनुभयो । अध्यक्ष पाैडेलले भन्नुभयाे, “पत्रकारहरू समाजका ऐना हुन् । राज्य र समाजका हरेक कुना–कन्दरामा रहेका आवाजविहीन नागरिकहरूको आवाज बनेर पत्रकारिताले न्यायको पक्षमा वकालत गर्नुपर्छ।”

अध्यक्ष पौडेलले विकास निर्माणका सकारात्मक कार्यहरूलाई उजागर गर्दै देश विकासमा खटिने नवप्रवर्तक र अभियन्ताहरूलाई उत्प्रेरणा प्रदान गर्न सञ्चार माध्यमले अग्रसरता लिनुपर्नेमा जोड दिनुभयो ।

समाज तथा राष्ट्रहित विपरीत हुने जुनसुकै गतिविधि, भ्रष्टाचार र अनियमितताका विरुद्ध पत्रकारहरूले खबरदारी गर्नुपर्ने बताउनुभयाे।

स्थानीय सरकार सञ्चार जगत संग सधैँ हातेमालो गरेर अगाडि बढ्न तयार रहेको स्पष्ट पार्दै अध्यक्ष पौडेलले आगामी दिनहरूमा स्थानीय तह र पत्रकार महासंघबीच बलियो सहकार्य हुने विश्वास समेत ब्याक्त गर्नुभयाे । 

कार्यक्रममा नेपाल पत्रकार महासंघका केन्द्रिय सदस्य भुपराज बस्याल, महासंघका पूर्व अध्यक्षहरु ओमप्रकाश शर्मा, प्रकाश डोटेल र श्रीकृष्ण सिग्देल, प्रेस सेन्टर गण्डकी प्रदेश अध्यक्ष अर्जुन काफ्ले, प्रेस युनियन जिल्ला सभापति तोलाकान्त बगाले, प्रेस चौतारी जिल्ला अध्यक्ष मणिप्रसाद अर्याल, प्रेस सेन्टर जिल्ला अ

ध्यक्ष केपी खनाल, जनपत्रकार संगठनका जिल्ला अध्यक्ष ध्रुव गौडेललगायतले बोल्नुभएको थियो । 

कार्यक्रममा स्याङ्जाको पत्रकारिता क्षेत्रमा महत्वपूर्ण योगदान पु¥याएकाे भन्दै महासंघका पूर्व अध्यक्षत्रय ओमप्रकाश शर्मा, प्रकाश डोटेल र श्रीकृष्ण सिग्देललाई सम्मानपत्र र दोसल्लाले सम्मान गरिएको थियाे । नेपाल पत्रकार महासंघ स्याङ्जाका पदाधिकारी, कार्यसमिति सदस्य तथा जिल्लाका क्रियाशील पत्रकारहरूको सहभागिता रहेको साधारण सभामा पत्रकारिता क्षेत्रका समसामयिक चुनौती र भावी याेजनाका बारेमा समेत छलफल गरिएकाे थियो । 

कार्यक्रममा महासंघका अध्यक्ष प्रदिप कोईराला, सचिव सुशील सुवेदी र काेषाध्यक्ष जाेगराज पाठकले प्रस्तुत गर्नुभएकाे प्रतिवेदन पारित गरिएकाे थियाे।