वालिङ,२० वैशाख- विश्व प्रेस स्वतन्त्रता दिवसका अवसरमा वालिङमा एक दिने स्वास्थ्य शिविर सम्पन्न भएको छ । नेपाल पत्रकार महासंघ स्याङ्जा शाखाले आज शनिबार निशुल्क स्वास्थ्य शिविरको आयोजना गरेको हो । वालिङ नगरपालिकाको सहयोग र गह्रौँ प्राथमिक अस्पताल वालिङको प्राविधिक सहयोगमा गह्रौँ प्राथमिक अस्पतालमा पत्रकारहरुका लागि नसर्ने रोग, आँखा परीक्षण तथा महिला पत्रकाहरुका लागि पाठेघरको मुखको क्यान्सरको स्क्रिनिङ गरिएको हो ।

शिविरको शुभारम्भ गर्दै वालिङ नगरपालिका उपप्रमुख कविता तिवारी गैह्रेले स्याङ्जाको पत्रकारीता विकास र दक्षताका लागि वालिङ नगरपालिका सँधै साथमा रहेको बताउनुभयो । नगरको समग्र विकासमा पत्रकारहरुको भूमिका महत्वपूर्ण रहने उहाँले बताउनुभयो ।

उपप्रमुख तिवारी गैह्रेले भन्नुभयो, “वालिङ स्याङ्जा जिल्लाकै केन्द्र हो, यहाँको विकासका लागि पत्रकारहरुको सुझाव र सहयोग आवश्यक पर्दछ । जनप्रतिनिधिले नदेखेका धेरै विषय पत्रकारहरुको आँखाले देख्न सक्छ । तसर्थ यहाँको विकासका लागि पत्रकारहरुको अमूल्य सुझाव र सल्लाहकासाथ हामी अगाडि बढ्नेछौँ ।” वालिङको छुट्टै गरिमा र पहिचान गरेकाले यसको साख बचाउँदै थप उचाईमा पु¥याउन तथा नगरका सकारात्मक कार्यहरुहरुलाई आम नागरिकसमक्ष पु¥याउनुपर्छ । यसकासाथै कमीकमजोरी औँल्याउन पनि पत्रकारहरुले भूमिका खेल्ने उपप्रमुख तिवारीको भनाई थियो । 

कार्यक्रममा नेपाल पत्रकार महासंघ स्याङ्जाका अध्यक्ष प्रदिप कोईरालाले सधै रिपाेटिङमा ब्यस्त हुने पत्रकारहरुले आफ्नाे स्वास्थ्यलाई पनि ध्यान दिनुपर्छ भन्ने उद्देश्यका साथ कार्यक्रम गरिएकाे बताउनुभयाे।

शिविरमा ७ जना महिला पत्रकारको पाठेघरको मुख क्यान्सरको स्क्रिनिङ, २४ जना पत्रकारहरुले आँखा, मुटु, सुगर, उच्च रक्तचाप, मृगौलाको परिक्षण गराएका छन् । शिविरमा गह्रौँ प्राथामिक अस्पतालका विशेषज्ञ डाक्टर सुमन थपलिया, मेडिकल अधिकृत डा. रोशन रेग्मी, अस्पताल नर्सिङ निरिक्षक भोजकुमारी शर्मा, ल्याब असिष्टेन्ट निरिक्षक इश्वर कोईराला लगायतको टिमले सेवा दिनुभएको थियो ।