काठमाडौँ,२७ भदौ-  प्रेचौतारी नेपालका अध्यक्ष गणेश बस्नेतलाई पक्राउ गर्न खोजिएको भन्दै पत्रकार संग सम्बन्धित संघ सस्थाले आफुहरुको ध्यानाकर्षण भएको जनाएकाछन् । नेपाल पत्रकार महासङ्घले प्रेस चौतारी नेपालका अध्यक्ष गणेश बस्नेतलाई समाचारको विषयलाई लिएर नेपाल प्रहरीको साइबर ब्यूरोले पक्राउको प्रयास गरेको घटनाप्रति महासङ्घको गम्भीर ध्यानाकर्षण भएको जनाएको छ ।

पत्रकार महासंघका महासचिव रोशन पुरी र प्रेस चौतारी नेपालका महासचिव हिरामान लामाले छुट्टाछुट्टै विज्ञप्ति जारी गर्दै समाचारमा चित्त नबुझेको अवस्थामा उजुरी गर्ने निकाय प्रेस काउन्सिल भएको जनाउदै समाचारको विषयलाई लिएर सादापोशाकका प्रहरी परिचालन गरेर पक्राउ गर्ने कार्य आफुहरुलाई सहिय नभएको जनाएकाछन् ।

महासङ्घका महासचिव रोशन पुरीले बिहीबार जारी गर्नुभएको प्रेस विज्ञप्तिमा काठमाडौँको एउटा होटलमा छलफल कार्यक्रममा सहभागी हुनुभएका अध्यक्ष बस्नेतलाई प्रहरीको साइबर ब्यूरोले जबरजस्ती पक्राउ गर्न खोजेपछि छलफलमा रहेका अन्य पत्रकारले प्रतिरोध गरेपछि पक्राउ नगरी प्रहरी फर्किएको उल्लेख छ ।

सम्प्रेषित समाचारप्रति परेका उजुरी तथा  गुनासा हेर्ने काम प्रेस काउन्सिल नेपालको भएको र काउन्सिलको क्षेत्राधिकारलाई हस्तक्षेप गर्दै प्रहरीले पत्रकार बस्नेतलाई पक्राउको प्रयास गरिएको यो घटनाले प्रेस स्वतन्त्रतामाथि गम्भीर आघात पुगेको महासङ्घले जनाएको छ। 

“महासङ्घ प्रहरीको यो हस्तक्षेपको कडा शब्दमा निन्दा गर्दछ र प्रेस स्वतन्त्रताको सम्मान गर्न सम्बन्धित पक्षको ध्यानाकर्षण गराउँदछ”, विज्ञप्तिमा उल्लेख छ।