वालिङ,२४ माघ- २०६३ सालदेखि वालिङ खेलमैदानमा महोत्सव सञ्चालन गर्दै आएको वालिङ उद्योग वाणिज्य संघले कोरोना महामारी र देशभर छाएको आर्थिक शिथिलताका कारण अलमल गरिरहेको थियो । २०७५ सम्म सातौं संस्करण सम्पन्न गरेको संघले आर्थिक चलायमानसँगै वालिङको शानलाई उजागर गर्न महोत्सवले खेलेको भूमिकालाई मध्येनजर गरेर आठौं महोत्सव सञ्चालनमा अगाडि बढ्यो । आठौं वालिङ महोत्सव सञ्चालनका सन्दर्भमा कहिले कार्यक्रम स्थल त कहिले प्रतिकूल समयलगायतका विषयले अलमल पारेको थियो । अलमल र केही विवादका वावजुद पनि संघले महोत्सव आयोजना गर्ने निधो गर्‍यो । फलस्वरुप यही माघ १८ देखि आठौं वालिङ महोत्सव २०८० सुरु भयो । यसपटकको महोत्सवको आयोजकमा वालिङ नगरपालिका पनि रहेको छ । सुरु भैसकेपछि पनि महोत्सव सफल, असफलका चर्चा चलिरहे । तर ढुलमुले चर्चा गर्नेहरु चर्चामै सीमित रहे, किनकि वालिङको शानलाई उजागर गर्नुपर्छ भनेर नागरिकहरुद्वारा वालिङ महोत्सवको निरन्तरताका लागि अनुमोदन गरेका छन् । दैनिकरुपमा उनीहरुको उत्साहजनक उपस्थितिले वालिङ महोत्सवको निरन्तरताका लागि अनुमोदन गरेको पुष्टी गराएको छ ।

यही २८ गतेसम्म सञ्चालन हुने महोत्सवको आजसम्म आइपुग्दा सातौंदिन पार गरिसकेको छ । महोत्सवमा दैनिकरुपमा दर्शकहरुको भीड लागिरको छ । स्याङ्जा डान्स आइडल सिजन थ्री, लोक भजनगीत, रत्यौलीगीत तथा विद्यालय स्तरीय नृत्यलगायतका प्रतियोगितात्मक कार्यक्रमहरुको साथमा राष्ट्रिय कलाकारहरुको दैनिक प्रस्तुति महोत्सवका आकर्षणहरु रहेका छन् । राष्ट्रिय कलाकारहरुको प्रस्तुतिकासाथै स्थानीय प्रतिभा प्रस्फुटन हुने भएपछि आम नागरिकहरुमा पनि सकारात्मक प्रभाव पारेको अनुमान गर्न सकिन्छ ।
यसैबीच आज बुधलबार स्थानीय प्रतियोगितात्मक कार्यक्रमकोसाथमा नियमित कार्यक्रम अनुसार राष्ट्रिय कलाकारहरुका प्रस्तुतिले दर्शकहरुलाई भरपूर मनोरञ्जन प्रदान गरेको उनिहरुको उत्साहले देखाएको छ । हरेक प्रस्तुतिमा दर्शकहरु स्वतः स्फूर्तरुपमा नाच्ने, ताली बजाउने र हुटिङ गर्ने जस्ता गतिविधीले उमङ्ग र उत्साहकासाथै महोत्सवलाई थप उर्जा प्रदान गरेको स्पष्ट छ ।

आजको प्रस्तुतिमा रचना रिमाल, प्रकाश पराजुली, सुजन लम्साल, उमादेवि खनाल, प्रिन्स लम्साललगायत राष्ट्रिय कलाकारको प्रस्तुतिले दर्शकहरुलाई झुमाएको थियो । सागर लम्साल बलेको हास्य प्रस्तुति र सृजना गुरुङको नृत्यले थप मनोरञ्जित बनाएको थियो । यसैगरी भोलि बिहिबार राष्ट्रिय कलाकार पूणर्कला विसी, चोलेन्द्र पौडेल, गोपाल जिटी, इन्द्रा गुरुङ, सीता परियार र गोविन्द रिजालकोसाथमा लोक आधुनिक तर्फ रमेशराज भट्टराई एवम् नृत्यकार सृष्टि बिकको प्रस्तुति रहने कलाकार संयोजन उपसमितिका संयोजक पिताम्वर खनाल (शुसिल) ले जानकारी दिनुभयो । यसैगरी हास्यतर्फ पुर्खे बा को विशेष प्रस्तुति रहने पनि कलाकार संयोजन उपसमितिका संयोजक खनालले बताउनुभयो ।