वालिङ,२४ माघ- वालिङ नगरपालिकाले आठौँ वालिङ महोत्सवमा व्यापार व्यवसाय गरिरहेका व्यापारीहरुसंग चियापान तथा अन्तरक्रिया गरेको छ । यही माघ १८ गतेबाट वालिङ उद्योग वाणिज्य संघको आयोजनामा सुरु भएको आठौँ महोत्सवमा व्यापारको लागि आएका व्यापारीहरु संग नगरपालिकाले बुधबार महोत्सव स्थलमै पुगेर चियापान तथा अन्तरक्रिया गरेको हो ।
अन्तरक्रिया कार्यक्रममा वालिङ नगरपालिकाका नगरप्रमुख कृष्ण खांणले वालिङ नगरपालिका पनि महोत्सवको आयोजक रहेको भन्दै महोत्सव सफल बनाउन नगरपालिका तथा सिंगो वालिङ लागिपरेको बताउनुभयो ।
बाहिर आएका हल्ला अनावश्यक रहेको भन्दै वालिङ महोत्सवले वालिङलाई राष्ट्रिय तथा अन्र्तराष्ट्रिय रुपमा चिनाउन मद्दत गरेको बताउँदै बाहिरबाट आउनुभउका व्यावसायीलाई स्वागत गर्दै नगरपालिका साथमा रहेको प्रमुख खांणले बताउनुभयो ।
नगरप्रमुख खांणले भन्नुभयो,“बाहिर आएका हल्लाको कुनै तुक छैन् । वालिङ महोत्सव हामी सबैको पर्व तथा साझा मञ्च हो । महोत्सवलाई सफल पार्न यहाँको स्थानीय सरकार सहित आम सर्वसाधरण उत्तिकै लागिरहनुभएको देखिएको छ । महोत्सवको सातौँ दिनआईपुग्दा जनसहभागिता बढ्दो छ । महोत्सवले विगतदेखि वालिङको पहिचान बनाउन टेवा पुर्‍याउँदै आएको छ, बनाएको छ ।”
कार्यक्रममा निर्वतमान नगरप्रमुख दिलिपप्रताप खांणले महोत्सव सफलतातर्फ उन्मुख भएको भन्दै महोत्सवमा सुरक्षा व्यवस्थालाई विषेश ध्यान दिन आग्रह गर्नुभयो । निर्वतमान नगरप्रमुख खांणले भन्नुभयो,“महोत्सवलाई व्यवस्थित गर्न सुरक्षा महत्वपुणर् पक्ष हो । धेरै जनसागर सहभागि हुने कार्यक्रममा सुरक्षा बलियो बनाउनुपर्छ ।”
साथै कुनै पनि कदम चाल्दा तथा कुनै कार्य सम्पन्न गर्दा केहि सकरात्मक र केहि नकरात्मक कुराहरु दुवै आउने भन्दै त्यस्ता दुवै पक्षलाई समन्वयकारी भुमिका निर्वाह गर्दै अगाडि बढ्न सुझाव दिनुभयो । कार्यक्रममा महोत्सवमा व्यापार गर्दै अएका व्यापारीहरुले मौसम प्रतिकुलताका कारण महोत्सवको उद्दघाटन र भोलीपल्ट व्यापार नभउको गुनासो गर्दै थप दुई दिन महोत्सव लम्ब्याउन आग्रह गरेका थिए । साथै उनीहरुले स्टलको शुल्क महंगो र व्यापार कम भएको गुनासो समेत गरेका थिए।