वालिङ,४ चैत– वालिङ नगरपालिका ९ भुम्रेमा रहेको पिस जोन इन्टिग्रेटेड एजुकेसनल एकेडेमीको १६ औं वार्षिक साधारण सभा एवं तेस्रो अधिवेशन सम्पन्न भएको छ ।
शुक्रबार सम्पन्न अधिवेशनले संस्थाका शेयर सदस्य सुदन श्रेष्ठको नेतृत्वमा सात सदस्यि व्यवस्थापन समिति समेत गठन गरेको छ । अध्यक्षमा श्रेष्ठ निर्विरोध निर्वाचित हुनुभएको हो । समितिको सदस्यहरुमा सच्चिदानन्द यादव, रमता पराजुली, कमल बहादुर कुँवर, विनोद कुमार श्रेष्ठ, हिमलाल पराजुली र सदस्य सचिवमा विद्यालयका प्रधानाध्यापक (प्रिन्सिपल) यामप्रसाद डुम्रे (अमृत) रहनुभएको छ ।
साधारण सभाले शैक्षिक क्षेत्रमा पिस जोन इन्टिग्रेटेड एजुकेसनल एकेडेमीलाई जिल्लामै एक नमूना शैक्षिक संस्थाको रुपमा स्थापित गर्नको लागि आवश्यक कार्यहरु गर्ने र प्रविधियुक्त गुणस्तरिय शिक्षा प्रदान गर्नको लागि आवश्यक कार्यहरु समेत गर्ने निर्णय गरेको छ ।
स्थापना कालको छोटो समयमै जिल्लाको शैक्षिक क्षेत्रमा पिस जोनले आफ्नो छुट्टै पहिचान बनाउन सफल भएको बताउदै अझ प्रभावकारी रुपमा संस्थालाई अगाडी बढाउने समेत साधारण सभामा सहभागी शेयरसदस्यहरुकोे भनाइ रहेको थियो ।
कार्यक्रममा विद्यालयका प्रधानाध्यापक यामप्रसाद डुम्रे (अमृत) ले संस्थाको वार्षिक प्रतिवेदन प्रस्तुत गर्नुभएको थियो । कार्यक्रममा सच्चिदानन्द यादव, रमता पराजुली, विनोद कुमार श्रेष्ठ, पुरन चन्द्र गैह्रे, भुवाप्रसाद डुम्रे, रेशमलाल न्यौपाने लगायतले बोल्नुभएको थियो । कार्यक्रम विद्यालयका व्यवस्थापन समितिका अध्यक्ष सुदन श्रेष्ठको अध्यक्षता र प्रेम प्रसाद तिवारीको सञ्चालनमा सम्पन्न भएको थियो । संस्थाका संस्थापक अध्यक्ष वसन्त श्रेष्ठको असामहिक निधन भएपछि सुदन श्रेष्ठले अध्यक्षको जिम्मेवारी समाल्दै आउनुभएको थियो । संस्थापक अध्यक्ष श्रेष्ठको निधन प्रति दुःख व्याक्त गर्दै संस्थालाई थप प्रभावकारी रुपमाअगाडी बढाउने समेत साधारण सभाले निर्णय गरेको छ ।
वालिङ नगरपालिका ९ भुम्रेमा २०६३ सालमा स्थापना भएको पिस जोन इन्टिग्रेटेड एजुकेसनल एकेडेमीले शैक्षिक क्षेत्रमा जिल्लामा आफ्नो छुट्टै पहिचान बनाउन सफल भएको छ । शैक्षिक गुणस्तरका कारण दिन प्रतिदिन विद्यालय प्रति विद्यार्थीको आकर्षण बढ्दै गएको पाइन्छ ।