वालिङ,३ चैत- गल्याङमा शुक्रबारदेखि मेला सुरुभएको छ । गल्याङ चेम्बर अफ कमर्सको आयोजनामा भएको प्रथम गल्याङ नगर आलु तथा कृषि प्रदर्शनी २०७९ को उद्घाटन गर्दै गण्डकी प्रदेश चेम्बर अफ कमर्शका अध्यक्ष किसान सुनारले कृषकलाई प्रविधिसंग जोड्नुपर्ने बताउनुभएको छ ।

कृषकलाई प्रविधिसंग जोड्दै यस पेशामा आर्कषण गर्नुपर्नेमा जोड दिनुभयो । कृषि पेशालाई व्यावसायीक रुवमा अगाडी बढाउनको लागि कृषिमा प्रविधिको प्रयोगका साथै कृषकले उत्पादन गरेका वस्तुको बजारीकरण सरकारले ध्यान दिनुपर्ने बताउनुभयो । कृषि प्रदर्शनी मेलाले कृषकहरुले उत्पादन गरेको कृषि उपजको बजारीकरणका लागि सहयोग पुग्ने अध्यक्ष सुनारको भनाइ थियो । आलु उत्पादनको लागि संभावना बोकेको गल्याङमा कृषकहरुलाई सामुहिक रुपमा खेती गर्न हौसला प्रदान गर्ने उहाँको भनाइ थियो ।

कार्यक्रममा गल्याङ नगरपालिकाकी उपप्रमुख हेमा न्यौपाने, स्याङ्जा चेम्बर अफ कमर्सका अध्यक्ष लोकनाथ रेग्मी, चेम्बर अफ कमर्श कास्कीका अध्यक्ष कुमराज बास्तोला, गल्याङ नगरपालिका ३ का वडा अधयक्ष कृष्ण प्रसाद भट्टराई लगायतले बोल्नुभएको थियो ।
कार्यक्रममा गल्याङ चेम्बर अफ कमर्सका अध्यक्ष गंगाप्रसाद श्रेष्ठले आलु कृषक र अन्य कृषकहरुलाई प्रोत्साहन गर्न प्रदर्शनीको आयोजना गरिएको जानकारी दिनुभयो । यस्तै, प्रदर्शनीको अवधिभर नीजि तथा सरकारी विद्यालयहरुबाट विभिन्न उत्कृष्ट नृत्यहरु प्रस्तुत गरिने अध्यक्ष श्रेष्ठले बताउनु भयो । प्रदर्शनीलाई थप आकर्षक बनाउन राष्ट्रिय कलाकारहरुको प्रस्तुति समेत रहने छ । प्रदर्शनीको पहिलो दिन शुक्रबार राष्ट्रिय कलाकार रोशन गैरे र सुनिता नेपालीले प्रस्तुति राख्नुभएको थियो भने शनिबार राष्ट्रिय कलाकार प्रकाश पराजुली र श्रीधर अधिकारीको प्रस्तुति रहने आयोजकले जनाएको छ । प्रदर्शनीमा कृषि सँग सम्बन्धित २० भन्दा बढी स्टलहरु रहेकाछन् ।

गल्याङ नगरपालिका ३ खेल मैदानमा सुरु भएको प्रदर्शनीमा दर्शकको उल्लेख्य सहभागिता रहोस भन्ने उद्देश्यले निशुल्क प्रवेशको व्यवस्था मिलाईएको छ । कार्यक्रम गल्याङ चेम्बर अफ कमर्शका अध्यक्ष गंगा प्रसाद श्रेष्ठको अध्यक्षता र वरिष्ठ उपाध्यक्ष अर्जुन रानाभाटको स्वागत मन्तव्य र महासचिव दल बहादुर सिंजालीले सञ्चालन गर्नुभएको थियो ।