वालिङ,५ माघ-स्याङ्जाको वालिङमा जारी पहिलो वालिङ गोल्डकप राष्ट्रिय फुटवल प्रतियोगिता अन्तर्गत एभिनिर फुटवल क्लव क्यामरुन फाइनलमा पुगेको छ । विहिबार भएको सेमिफाइनल खेलबाट एभिनिर फुटवल क्लव क्यामरुन फाइनलमा पुगेको हो । एभिनिरले आयोजक रातोलाई शुन्यका विरुद्ध दुई गोल गर्दै फाइनलकोे यात्रा तय गरेको हो ।

खेल सुरु भएको एक मिनेटमा एभिनिरका आनिसेले गोल गर्ने मौका पाएका थिए । आनिसेको फ्रिकिक प्रहार गोलपोष्टको पिलरमा लागेर फर्केको थियो । एभिनिरले सुरुदेखि नै आयोजक रातोलाई दवावमा पारेपनि पहिलो हाफ गोल रहित सकियो । आयोजक रातोको डिफेन्स र गोलकिपरको कुशलताले पहिलो हाफमा कुनैपनि गोल हुन सकेन । आयोजक रातोलाई कम्जोर ठानेको एभिनिरले ८४ औं मिनेटसम्म गोल गर्न सकेन ।

सजिलै जीत निकाल्ने दाउमा रहेको एभिनिरका लागि ८५ औं मिनेटमा आएर टिम्वा टिम्वाले गोल गर्न सफल भए । खेलको ९० मिनेटपछि ८ मिनेड थप गरियो । यसपछिको ५ मिनेटमा एभिनिरका सावाले गोललाई दोव्वर पारे । यो गोलसँगै एभिनिरले आयाृेजक रातोलाई शुन्यका विरुद्ध दुई गोल गरी फाइनलमा पुगेको हो । अब एभिनिरले आयोजक निलोसँग शनिबार प्रतिस्पर्धा गर्नेछ ।

आजको सेमिफाइनल खेलमा एभिनिरका सावा म्यान अफ द म्याच घोषित भए । पहिलो वालिङ गोल्डकप राष्ट्रिय फुटवल प्रतियोगिताको विजेताले रु ५ लाख र उपविजेताले २ लाख पचास हजार नगदसहित ट्रफी, मेडल र प्रमाणपत्र प्राप्त गर्नेछन् ।