वालिङ,१० चैत– प्रधानमन्त्री शेरबहादुर देउवाले निर्वाचन तोकिएकै समयमा हुने बताउनुभएको छ । चापाकोट नगरपालिकाको नवनिर्मित प्रशासकीय भवनको आज उद्घाटन गर्दै प्रधानमन्त्री देउवाल स्थानीय तहको निर्वाचन तोकिएकै समयमा निष्पक्ष, स्वतन्त्र र भयरहित वातावरणमा सम्पन्न हुने बताउनुभएको हो ।

स्थानीय सरकार पारदर्शी र जनउत्तरदायी भएर जनताको मन जित्ने गरी काम गर्नु पर्ने बताउनुभयो । नेपाली कांग्रेसका सभापती समेत रहनुभएका प्रधानमन्त्री देउवाले भन्नुभयो, “स्थानीय सरकार जनतासँग प्रत्यक्ष जोडिने सरकार भएकाले यसका काम कारबाही पारदर्शी र जनउत्तरदायी हुनुपर्छ ।”

श्रम, रोजगार तथा सामाजिक सुरक्षामन्त्री कृष्णकुमार श्रेष्ठले स्थानीय तहको निर्वाचनमा पाँच दलीय गठबन्धन कायम रहने बताउनुभयो । श्रेष्ठले देशलाई प्रतिगमनकारीबाट बचाउनका लागि पाँच दलीय गठबन्धन जरुरी रहेको र कालीगण्डकीको सभ्यता संरक्षणका लागि केन्द्र सरकार प्रतिबद्ध रहेको बताउनुभयो ।

चापाकोट नगरपालिका धेरै सम्भावना बोकेको पालिका भएकाले पनि यसको विकासका लागि स्थानीय सरकार लागिपरेको नगरप्रमुख शिवकुमार गिरीले बताउनुभयो । स्थानीय सरकारले प्रदेश र केन्द्रीय सरकारसँग सहकार्य, समन्वय गर्दै विकास निर्माण गर्दै अघि बढ्ने नगरप्रमुख गिरीले बताउनुभयो ।