वालिङ,११ फागुन– आँधीखोला गाउँपालिका वडा नम्बर ४ बाङसिङमा निर्माण गरिएको वडा कार्यालय भवनको उद्घाटन गरिएको छ । भवनको गाउँपालिका अध्यक्ष सुधिर कुमार पौडेलले नवनिर्मित भवनको एक कार्यक्रमका बिच उद्घाटन गर्नुभएको हो ।

गाउँपालिका अध्यक्ष सुधिर कुमार पौडेलले हालसम्म शिक्षा, स्वास्थ्य, पूर्वाधार विकास, खानेपानी, कृषि, पर्यटन, श्रम तथा रोजगार, लगायतका अन्य क्षेत्रहरूमा गरिएका मुख्य मुख्य उपलब्धीहरू बारेमा जानकारी दिनुभएको थियो । व्यवस्थित संरचनाबाट गुणस्तरीय सेवा दिएर जनतालाई सहज बनाउने योजनाअनुरुप सबै वडा कार्यालय भवनको निर्माण गर्ने नीति अनुसार पाँच वटा वडा कार्यालय भवन सम्पन्न भएको बताउँदै आगामी वर्ष वडा नं २ को भवनसमेत सम्पन्न गरी ६ वटै वडा कार्यालय भवन सम्पन्न गर्ने अध्यक्ष पौडेलले बताउनुभयो ।
कुनै पनि विकास निर्माणका कामहरु गाउँपालिका एक्लैले मात्र सम्भव नभएकोले जनताको पूर्ण सहभागिता जरुरी भएको गाउँपालिका उपाध्यक्ष शर्मिला देवी पौडेलले बताउनुभयो ।

गाउँपालिकाको आर्थिक वर्ष २०७७÷०७८ को रु ९८ लाखको लागतमा दुई तले वडा कार्यालय भवन निर्माण गरिएको प्रमुख प्रशासकीय अधिकृत युवराज अधिकारीले बताउनुभयो । वडा नं. ४ का वडा अध्यक्ष चिन्तामणी पौडेलले वडा कार्यालयबाट हुने सेवा प्रवाह अब थप प्रभावकारी हुने बताउदै भवन निर्माणमा सहयोग, सहकार्य तथा योगदान गर्नुहुने सम्पूर्णमा आभार व्यक्त गर्नुभयो ।