गोपाल जिटी

वालिङ,९ पुस– नेकपा एमालेकी सचिव एवं पूर्व मन्त्री पद्माकुमारी अर्यालले किसानहरुले अब झोलामा, डोकामा बोकेर बजार खोजन जाने होइन, बजार आफ्नै घरखेतमा आउनेगरी व्यवसायी बन्नुुपर्ने बताउनुभएको छ ।

पुर्खाले जे सिकायो त्यहि गरेर निर्वाहमुखी कृषिमा सन्तोष मानेर बस्ने अबको समय होइन एक गाउँ एक उत्पादनको अवधारणा सहित व्यवसायिकरुपमा आयआर्जन जुट्नुपर्ने पूर्वमन्त्री अर्यालले बताउनुभयो ।

शुक्रबार वालिङमा अकला नमूना साना किसान कृषि सहकारी संस्थाको तेस्रो वार्षिक साधारणसभामा सम्वोधन गर्दै पूर्वमन्त्री अर्यालले केहि गर्न नसक्ने, केहि नभएका र केहि नजानेकाले कृषि गर्ने हो भन्ने सोंच गलत हो, यसलाई त्याग्नुपर्ने उल्लेख गर्नुभयो ।

जीवन धान्ने भनेको कृषि हो, केहि नहुनेले गर्ने पेशा होइन भन्ने बुभ्mनुपर्छ । कृषि पेशालाई हेयको दृष्टिले हेर्ने होइन, सम्मानित पेशा हो र एकले अर्कालाई सहयोग र सम्मान गरेर अगाडि बढ्नुपर्ने आजको आवस्यकता रहेको उहाँको भनाई छ । कतिले व्यापार गर्नुहुन्छ त कतिपयले जागिर खानुहुन्छ यो भनेको आत्मनिर्भर बन्ने, स्वावलम्वी बन्ने आधारको खोजी हो ।

विभेदको जड भनेको आर्थिक हो, जबसम्म आर्थिकरुपमा स्वावलम्वी बन्न सकिदैन तवसम्म समाजमा विभेद कायम रहन्छ । पूर्वमन्त्री अर्यालले साना किसान कृषि सहकारीको अर्जुन दृष्टि व्यवसायिक कृषि हो, पैसा जम्मा गर्ने, चाहिएको बेलामा झिकेर खर्च गर्ने या कर्जा लिने व्याज तीर्ने मात्र नभएको उल्लेख गर्नुभयो ।

२०७५मा वालिङमा स्थापना भएको अकला नमूना साना किसान कृषि सहकारी संस्थाले तेस्रो वार्षिक साधारणसभा सम्पन्न गरेको हो । ९५ प्रतिशत महिलाहरुको सहभागिता रहेको संस्थाले वालिङका साथै गल्याङ नगरपालिकाका केहि वडामा आफ्नो कार्यक्षेत्र विस्तार गरिसकेको अध्यक्ष पुण्य अर्यालले जानकारी गराउनुभयो । किसानहरुलाई आर्थिक पक्षमा सवल बनाउनुका साथै वालिङलाई दूधमा आत्मनिर्भर बनाउने उद्देश्यले डेरी जोन कार्यक्रम समेत सञ्चालन ल्याइएको अध्यक्ष अर्यालले उल्लेख गर्नुभयो ।

करिव २ हजारजना शेयर सदस्य रहेको सहकारीले ६ करोड बढीको कारोवार गरिसकेको छ । सहकारीले डेरी सञ्चालनमा ल्याई वालिङ आसपासका किसानहरुको दूध संकलन गरी दुग्धजन्य पदार्थको विक्रि वितरण समेत गर्दै आएको छ ।