वालिङ,२३ मङ्सिर– वालिङ नगरपालिकाले टोल टोलमै पुगेर पशु स्वास्थ्य सेवा उपलब्ध गराउन शुरु गरेको छ ।

वालिङ नगरपालिका पशु सेवा शाखाले टोल टोलमा पुगेर पशु स्वास्थ्यसम्बन्धी सेवा प्रदान गर्ने र समस्या समाधानका लागि पहल गर्ने अभियानको आज नगर प्रमुख दिलीपप्रताप खाँणले वालिङ ४ च्यारेमा उद्घाटन गर्नुभएको हो ।

नगरपालिकाका विभिन्न वडामा पशुपालन गर्दै आएका किसानहरुलाई ब्यवसायिकतातर्फ आकर्षित गर्न र ब्यवसाय सञ्चालनका क्रममा आईपरेका समस्याहरुको समाधानका लागि सहयोग गर्ने उद्देश्यसहित अभियानको थालनी गरिएको नगर प्रमुख खाँणले बताउनुभयो ।

परम्परागत र निर्वाहमुखी पशुपालनभन्दा पनि ब्यवसायिकतातर्फ जोड दिनुकासाथै आईपरेका समस्याहरुकाबारेमा सम्बोधन गर्नका लागि आवश्यक नीति नियमहरु बनाउन सहयोग पुग्ने विश्वास नगर प्रमुख खाँणले ब्यक्त गर्नुभयो ।

नगरपालिकाले वडाहरुमा पशु प्राविधिकहरु थप गरी समयमै पशुसम्बन्धी स्वास्थ्य सेवा तथा पशुपालन गर्दा आईपर्ने प्राविधिक समस्याहरुकाबारेमा समाधान गर्दै लगिने नगर प्रमुख खाँणले बताउनुभयो । चालु आर्थिक वर्षमा नगरका विभिन्न वडामा यो अभियान सञ्चालन गरिने पशु सेवा शाखाका प्रमुख डा. बसन्तकुमार अधिकारीले बताउनुभयो ।

नगरपालिकाको प्रत्यक्ष प्राविधिक सेवा नपुगेका टोलहरुमा पशुपंक्षीको स्थलगत उपचार, निशुल्क औषधि वितरण र गोठ तथा फर्ममै पुगेर पशु तथा पंक्षीहरुको निरीक्षणसँगै आवश्यक परामर्श तथा सुझावहरु दिईने शाखा प्रमुख अधिकारीले बताउनुभयो ।