वालिङ,१३ भदौ– केही दिनदेखि परेको अविरल वर्षाले जिल्लामा मानविय संगै भौतिक संरचनामा समेत क्षती पुर्याएको छ । आज(आइतबार) दिउसो घर माथिबाट पहिरो खस्दा गल्याङ नगरपालिका १ राम्दीमा एक जनाको मृत्यु भएको छ भने ३ घर पुरिएकाछन् ।

वालिङ नगरपालिका १४ की ४० वर्षीया घनमाया उम्रा लाई बस्नेत होटलमा पुरिएर मृत अवस्थामा भेटिएको प्रहरीले जनाएको छ । गुल्मी छत्रकोट गाउँपालिका घर भइ होटल सञ्चालन गर्दै आउनुभएकी ३७ वर्षीय लक्ष्मी बस्नेत लाई उद्धार गरेर उपचारको लागि पाल्पा लगिएको छ । यसै गरी सोही होटलमा रहेका रुपन्देही सैनामैना नगरपालिका १ का १६ वर्षीय शिशिर योगी, भीरकोट नगरपालिका ५ का ३६ वर्षीय नारायणप्रसाद तिवारीलाई उपचारको लागि पाल्पा लगिएको र मिसन अस्पतालमा उपचार भइरहेको जिल्ला प्रहरी कार्यालले जनाएको छ ।

पहिरोले दिपेन्द्र श्रेष्ठका, लक्ष्मी बस्नेतले सञ्चालन गरेको बस्नेत होटल पुरेको छ भने सीता परियारको घरमा पनि क्षती पुर्याएको जिल्ला प्रहरी कार्यालय स्याङ्जाका प्रहरी नायव उपरीक्षक राजेन्द्रप्रसाद अधिकारीले जानकारी दिनुभयो । सड्क माथिबाट आएको पहिरोले सड्क समेत अवरुद्ध पारेकोले यो समाचार तयार पार्दा सड्क अवरुद्ध रहेको छ भने सड्क खुलाउने प्रयास भइरहेको प्रहरीले जनाएको छ ।