दर्वेन्द्र देव खनाल

गल्याङ,१८ जेठ– स्याङ्जा जिल्लाको गल्याङ नगरपालिका ११ दिमिकमा रहेका युवाहरु गाउँमा जागरण ल्याउन एकजुट भएर लागेकाछन् । उनीहरुलाई यो अवसर जुटाइदिएको हो दिमिक युवा क्लबले । क्लबमा अवद्ध युवाहरुले कोरोना भाइरस (कोभिड १९) को दोस्रो लहर बढिरहेका बेला गाउँमा बिभिन्न किसिमका जनचेतना मूलक कार्यक्रमहरु गर्दै आएकाछन् ।
संक्रमणबाट जोगिन स्थानीय बासिन्दालाई सहयोग पुर्याउने उद्देश्यले क्लबले बिभिन्न कार्यक्रमहरु सञ्चालन गर्दै आएको छ ।
नगरको विभिन्न वडामा कोरोना संक्रमणबाट संक्रमित बिरामीको मृत्यु हुने क्रम बढेसंगै कोरोना भाइरसका लक्षण, यसका रोकथामका उपाय र विभिन्न घरेलुु औषधीको सेवनका बारेमा घरघरमा पुगेर बिभिन्न किसिमका परार्मशहरु दिदै आएकोे क्लबका अध्यक्ष ढाकाराम भट्टराईले बताउनुु भयो ।

कोरोना संक्रमण तिब्र रुपमा बढिरहेको समयमा आफ्नै लगानीमा मास्क, सेनिटाइजर लगायतका विभिन्न स्वास्थ्य सामाग्रीहरु खरिद गरी गाउँका करिब १ सय ५० घर धुरीमा पुुगी स्वास्थ्य सामग्री वितरण गरिएको अध्यक्ष भट्टराईले बताउनुभयो ।
२०७६ सालमा स्थापना गरिएको क्लबले बिभिन्न किसिमका रचनात्मक कामहरु गर्दै आएको छ । ठाउँको समग्र क्षेत्रको सकारात्मक विकासको हेतुुले स्थापना गरेको दिमिक युवा क्लबले आफ्नो सामाजिक उत्तरदायित्वलाई बहन गर्दै महामारीको अवस्थामा एक अभिभावक बनेर गाउँमा सक्रिय रहेको छ । स्थापनासंगै विभिन्न रचनात्मक कृयाकलापहरु गर्दै आएको क्लबले विभिन्न ठाउँमा सडक होडिङबोर्ड निर्माण,सडक बत्ती व्यवस्थापन, गाउँटोल सरसफाई लगायतका कार्यहरु गर्दै आएको छ । गत वर्षको कोरोना भाइरसको महामारीका कारण विद्यालय बन्द भएर विद्यालय जान नपाएका बालबालिकाहरुलाई विभिन्न टोलमा सिमित संख्यामा समूह बनाई श्रोतव्यक्तिहरुलाई परिचालन गरी टोल शिक्षा अन्तर्गत अध्ययन अध्यापन समेत गरेको थियो ।

महामारीका कारण सबै व्यक्तिहरु घरमै बसेको यो अवस्थामा दिमिकका युवाहरुको सक्रियताले गाउँमा उत्साह थपेको समाजसेवी अर्जुुन भुुजेलले बताउनुु भयो । युवाहरुले महामारीमा देखाएको सक्रियताले उनीहरु प्रति गाउँबासीको आशा जागेको पाइन्छ । सामाजिक क्षेत्रमा क्लबका सदस्यहरुले देखाएको सक्रियताबाट प्रभावित भएर देश तथा विदेशमा रहेका युुवाहरुले आर्थिक सहयोग गर्ने क्रम समेत बढेको क्लबले जनाएको छ ।