गणेशपुर स्वास्थ्य चौकीमा २० बेडको आइसोलेसन वार्ड बन्दै

स्याङ्जा,२२ वैशाख– कोरोना भाइरस (कोभिड १९) को दोस्रो चरणको संक्रमणको तिब्र रुपमा बढ्दै गएको अवस्थामा संक्रमणलाई मध्यनजर गर्दै पुतलीबजार नगरपालिकाले २० बेडको आइसोलेसन वार्ड तयार गरेको छ । नगरपालिका प्रमुख सीमाकुमारी क्षेत्रीले केन्डाडामा स्वास्थ्य चौकीमा २० बेडको आइसोलेसन वार्ड तयार पारिएको र गणेशपुर स्वास्थ्य चौकीमा २० बेडको आइसोलेसन वार्ड बनाउने काम भइरहेको जानकारी दिनुभयो ।

नगरप्रमुख क्षेत्रीले कोरोनाको बढ्दो संक्रमणलाई मध्यनजर गरेर नगरभित्र रहेका बिभिन्न स्वास्थ्य चौकीहरुमा आइसोलेसन वर्ड तयार पार्नेकाम भइरहेको बताउनुभयो । कोरोना संक्रमितको संख्या बढ्दै जादा बेडको अभावमा उपचारमा समस्या हुने अवस्था आउन नदिनको लागि नगरपालिका संरचनाको निर्माण कार्यमा जुटिरहेको बताउनुभयो । नगरप्रमुख क्षेत्रीले भन्नुभयो, “यहि दरमा संक्रमणको अवस्था बढ्दै गएमा विरामीले उपचारको लागि बेडको अभावमा ज्यान गुमाउनुपर्ने अवस्था पनि आउन सक्छ । त्यो अवस्था नआओस भनेर नगरपालिका यतिबेला संरचना निर्माणमा जुटेको छ ।” अहिलेको अवस्थामा नगरवासीको स्वास्थ्य नै पहिलो प्राथमिकता भएकोले सिंगो नगरपालिका कोभिको व्यवस्थापन कसरी गर्न सकिन्छ भनेर लागिरहेको नगरप्रमुख क्षेत्रीको भनइ थियो ।