स्याङ्जा,२१ वैशाख– कोरोना भाइरस (कोभिड १९) को दोस्रो चरणको संक्रमणको दर बढेसंगै वालिङ नगरपालिकाले अक्सिजन सहितको सुविधा सम्पन्न बेड तयार गरेको छ । तत्कालका लागि गह्रांै प्राथमिक अस्पतालको परिसरमा अक्सिजन र निवुलाईजर सहितको बेड तयार पारिएको नगर प्रमुख दिलिप प्रताप खाँणले जानकारी दिनुभयो । उहाँले भन्नुभयो, “पहिलो चरणमा ६ वटा बेड तयार गरेका छौं आवश्यक्ता अनुशार थप गर्ने छौं ।” ठाँउको व्यवस्थापन गरिसकिएको जानकारी दिदै नगरप्रमुख खाँणले नगरवासिलाई नआत्तिन आग्रह समेत गर्नु भयो । अस्पताल परिसरमा बन्दै गरेको नयाँ भवनलाई सुविधा सम्पन्न आईसोलोसनका रुपमा बिकास गरिने प्रमुख खाँणको भनाई छ ।
नगरपालिकाले अस्पतालमा नै कोरोनाको एन्टिजेन समेत परिक्षण गर्दै आएको अस्पतालका प्रमुख डाक्टर सरोज थापाले बताउनु भयो । उहाँले संक्रमित बढ्ने क्रममा रहेको र त्यही अनुशार तयारी पनि गरिरहेको जानकारी दिनुभयो ।
कोरोना संक्रमित बिरामीहरुका लागि भर्ना गरी सबै खाले सेवा प्रदान गर्ने गरी आफूहरु तयारी अवस्थामा रहेको अस्पतालका अधिकृत तथा सूचना अधिकारी देवेन्द्र प्रसाद भट्टराईले बताउनु भयो । उहाँले भन्नुभयो, “कोरोना संक्रमितको लागि उपचारमा आवश्यक पर्ने सबै सामाग्रीहरु नगरपालिकाले जुटाई सकेको छ ।”

वालिङमा १६ जना कोरोना संक्रमित थपिए
मंगलबार वालिङमा १६ जना कोरोना संक्रमित थपिएका छन् । गह्रौँ प्राथामिक अस्पताल वालिङमा गरिएको एन्टिजिन परिक्षणमा उक्त संख्यामा संक्रमित पुष्टी भएका हुन् । वालिङ नगरपालिकाले एक विज्ञप्ति जारी गर्दै मंगलबरा १६ जनामा पुष्टी भएको जनाएको छ । वडा नं. १ र २ का १÷१ जना, वडा नं. ६ का २ जना, वडा नं. ८ का २ जना, वडा नं. ९ का ४ जना, वडा नं. १० का २ जना, वडा नं. ११ का १ जना, वडा नं. १२ का २ जना र वडा नं. १३ का १ जना गरी १६ जनामा संक्रमण पुष्टी भएको हो ।
संक्रमण हुनेहरु वडा नं. १ का ३१ वर्षीय पुरुष, २ का ४० वर्षीय पुरुष, ६ का १९ वर्षीया महिला र ४८ वर्षीय पुरुष, ८ का ३३ वर्षीया महिला र २४ वर्षीय पुरुष, ९ का ३०, ३२, ४६ वर्षीया महिला र ३७ वर्षीय पुरुष, १० का ३५ वर्षीया महिला र ६३ वर्षीय पुरुष, ११ का ५० वर्षीया महिला, १२ का ५७ वर्षीया महिला र ४८ वर्षीय पुरुष, १३ का ८० वर्षीय पुरुष रहेका छन् । अहिले वालिङमा मात्रै सक्रिय संक्रमितको संख्या १६३ पुगेको छ ।
यसै बीच जिल्लाभर २४ जना संक्रमित थपिएका छन् । मंगलबार थपिएका २४ सहित जिल्लामा सक्रिय संक्रमितको संख्या २७५ पुगेको छ ।