काठमाडौँ,२० चैत– राष्ट्रपति विद्यादेवी भण्डारीले मेलम्ची खानेपानी आयोजनाले काठमाडौँको खानेपानी समस्या समाधान गर्नुका साथै वातावरण संरक्षणमा समेत महत्त्वपूर्ण योगदान पुग्न विश्वास व्यक्त गर्नुभएको छ ।
मेलम्ची खानेपानी आयोजना खानेपानी वितरण कार्यको आज काठमाडौँमा एक कार्यक्रमका विच शुभारम्भ गर्दै राष्ट्रपति भण्डारीले सो कुरा बताउनुभएको हो । आयोजनाले खानेपानी समस्या समाधान गर्नुका साथै उपत्यकाका जलाधार क्षेत्रहरूको संरक्षणमा समेत योगदान पुग्ने उहाँको भनाइ थियो ।
राष्ट्रपति भण्डारीले मेलम्ची आयोजनाबाट दीर्घकालसम्म लाभ लिनका लागि यसको सफल कार्यान्वयन र उचित संरक्षणमा ध्यान दिनुपर्नेमा जोड दिनुभयो ।
राष्ट्रपति भण्डारीले मानव जीवनसँग प्रत्यक्ष जोडिएको जलश्रोतको संरक्षण तथा पानीको दिगो उपभोग सुनिश्चित गर्न विश्वविद्यालय एवं प्राज्ञिक संस्थाहरूलाई आवश्यक अध्ययन–अनुसन्धानमा जोड दिन समेत आग्रह गर्नुभयो ।

कार्यक्रममा प्रधानमन्त्री ओलीले कोरोना भाइरसका कारण फैलिएको विश्वव्यापी महामारीका समयमा समेत सरकारले विकास निर्माणका काम प्रभावित हुन नदिएको र त्यसैको परिणाम स्वरूप मेलम्ची लगायतका राष्ट्रिय गौरवका आयोजनाहरू पुरा हुने चरणमा पुगेको बताउनुभयो ।
प्रधानमन्त्री ओलीले आगामी तीन वर्षभित्र मेलम्ची आयोजनाका सहायक आयोजनाहरू याङ्ग्री र लार्के खोलाको पानी समेत काठमाडौँ ल्याएर वितरण गर्ने गरी काम अगाडि बढाउन सम्बन्धित निकायलाई निर्देशन दिनुभयो ।

मेलम्ची खानेपानी आयोजना अन्तर्गत सिन्धुपाल्चोकको हेलम्बु–मेलम्ची क्षेत्रका मेलम्ची, याङ्ग्री र लार्के खोलाबाट १७–१७ करोड लिटरका दरले कूल ५१ करोड लिटर पानी काठमाडौँ उपत्यकामा ल्याउने लक्ष्य रहेको छ । जसमध्ये आयोजनाको पहिलो चरणमा मेलम्चीबाट १७ करोड लिटर पानी काठमाडौँ ल्याउने काम सम्पन्न भएको छ भने आजदेखि औपचारिक रूपमा ग्राहकको धारामा पानी पुगेको छ ।