गल्याङ,६ फागुन– गल्याङ नगरपालिका ३ गल्याङबजारमा रहेको भानुभक्त आचार्य माध्यमिक विद्यालयको ५६ औं वार्षिकोत्सव बिहीबार सम्पन्न भएको छ । वार्षिकोत्सव समारोहमा बोल्दै नगरप्रमुख भुपराज अधिकारीले विद्यार्थीका लागि नगरपालिकाले विशेष कार्यक्रम ल्याउन लागेको बताउनुभयो ।
नगरप्रमुख अधिकारीले भन्नुभयो, ‘बालबालिकालाई कसरी राम्रो बनाउने भन्ने बारेमा सबैले महत्व दिनुपर्ने हुन्छ । भोली कस्तो बनाउने भन्ने कुरा आजका विद्यार्थीको भविश्यले निर्धारण गर्छ । त्यसकारण हामी विद्यालय लक्षित बालबालिका केन्द्रीत कार्यक्रम ल्याउन लागेका छौं ।’
नगरप्रमुख अधिकारीले गल्याङमा कृषि र पूर्वाधारका क्षेत्रमा विभिन्न कामहरु भैरहेको बताउदै अब शिक्षा क्षेत्रलाई अझै बढि प्राथमिकतामा राखेर काम गर्ने बताउनुभयो ।

कार्यक्रममा गरिमा विकास बैंकका अध्यक्ष श्यामप्रसाद बस्यालले विद्यालयलाई राम्रो बनाउनका लागि आफ्नो तर्फबाट सम्पूर्ण सहयोग रहने बताउनुभयो ।
उहाँले विद्यालयबाट उत्पादित जनशक्ति अहिले धेरै ठाउँमा पुगेको भन्दै गल्याङको केन्द्रमा रहेको यस विद्यालयलाई सबैले प्राथमिकता दिनुपर्नेमा जोड दिनुभयो ।
अध्यक्ष बस्यालले विद्यालयको गुणस्तर बृद्वि गरी अझै राम्रो बनाउन विद्यार्थी, अभिभावक, सरकार र सबै नागरिकको उत्तिकै दायित्व हुने बताउनभयो ।
कार्यक्रममा गल्याङ नगरपालिका शिक्षा तथा खेलकुद शाखाका प्रमुख केदारराज आचार्य, नगरपालिका शिक्षा समिति सदस्य, राजेन्द्रदेब खनाल लगायतले आफ्नो भनाई राख्नुभएको थियो ।