गल्याङ, २८ माघ– जन्मदिनको अवसरमा गरिने खर्च कटाएर गल्याङ नगरपालिका पशु सेवा शाखा प्रमुख सुशिल अर्यालले जेष्ठ नागरिकलाई सहयोग गर्नुभएको छ । गल्याङ नगरपालिका १ राम्दीमा रहेको शिपार्वती बृद्धा आश्रममा बस्दै आएका जेष्ठ नागरिकहरुलाई अर्यालले एक दिनको भोजनको लागि रु ६ हजार ५ सय रुपैँया हस्तान्तरण गर्नुभएको हो ।
आफ्नो ४५ औं जन्मदिनको अवसरमा जेष्ठ नागरिकहरुलाई सहयोग गर्न पाउँदा निकै खुशी लागेको अर्यालले बताउनुभयो । उहाँले जन्मदिनको अवसरमा पार्टी गर्ने लगायतका फजुल खर्च गर्ने कार्यलाई निरुत्साहित गर्नका लागि आफुले सानो सहयोग गरेको बताउनुभयो ।
अर्यालले भन्नुभयो, ‘जेष्ठ नागरिक सबैको प्रेरणाको श्रोत हुनुहुन्छ, त्यसैले सानो सहयोग गरेको मात्रै हो । सहयोग गर्न पाउँदा मनमा सन्तुष्टि मिलेको छ ।’ जेष्ठ नागरिकलाई सबैले आफ्नो क्षमता अनुसार सहयोग गर्नु पर्ने अर्यालले बताउनुभयो ।
आश्रमका व्यवस्थापक सुनिल श्रेष्ठले सरदरमा दैनिक एक जनाका दरले भोजन गराउनेहरु आउने गरेको बताउनुभयो । आश्रममा अहिले १६ जना जेष्ठ नागरिक बस्दै आएकाछन् ।

वालिङ हस्पिटलको सूचना