वालिङ,१ पुस– वालिङ नगरपालिका ११ ले कृषकहरुलाई टनेल वितरण गरेको छ । वडा कार्यालय डौँवामा अयोजित टनेल वितरण कार्यक्रममा बोल्दै वालिङ नगरपालिका उपप्रमुख कल्पना तिवारीले व्यवसायिक तरिकाले कृषि कार्यमा लाग्न आग्रह गर्नुभयो ।
उपप्रमुख तिवारीले कृषिको व्यवसायीकरण विना कृषकको स्तरवृद्धि हुन नसक्ने भन्दै व्यवसायीक रुपमा काम गर्ने कृषकलाई नगरपालिकाले आवश्यक सहयोग गर्ने बताउनुभयो । उपप्रमुख तिवारीले भन्नुभयो, ‘माटो हावापानी सुहाँउदो कृषिप्रणालीमा लाग्नुहोस आवश्यक सहयोग गर्न नगरपालिका तयार छ ।’ कृषकले उत्पादन गरेको वस्तुका बजारीकरणको जिम्मा समेत नगरपालिकाले लिने तिवारीले बताउनुभयो ।
कृषकका उत्पादनले बजार नपाएर कुहाउनुपर्ने अवस्थाको सृजना नहुँने भन्दै उपप्रमुख तिवारीले कृषकलाई प्रोत्साहन गर्न यस्ता कार्यक्रमले टेवा पुग्ने बताउनुभयो ।
कार्यक्रममा १ नम्बर वडाका अध्यक्ष एवं नगर प्रवक्ता केदार काफ्ले र सामाजिक विकास अधिकृत पदमपाणी पाण्डेले सामुहिक रुपमा कृषिमा लाग्दा काममा सहज हुने भन्दै व्यवसायिक ढंगबाट अगाडि बढ्न आग्रह गर्नुभयो । वडा अध्यक्ष बसन्त मल्लको अध्यक्षतामा सम्पन्न कार्यक्रममा स्वागत वडा सदस्य चोलाकान्त पौडेल र सञ्चालन नगेन्द्र पराजुलीले गर्नुभएको थियो । १९ हप्ते आईपिएम कृषि पाठशालामा सहभागि ३० जना कृषकहरुलाई टनेल वितरण गरिएको हो । आईपिएम कृषक पाठशालमा सहभागी कृषकहरुले टमार र अकबरे खुर्सानी उत्पादन गर्दै आएकाछन् ।