स्याङ्जा, २५ मङ्सिर, आँधीखोला गाउँपालिकाले खोलामा ५२ हजार माछाका भुरा छाडेको छ । पर्यावरणीय सन्तुलन कायम राख्ने उद्देश्यले गाउँपालिकाले आँधीखोलामा ५२ हजार माछाका भुरा छोडिएको जनाएको छ ।
कालीगण्डकी माछा प्रजनन केन्द्रबाट ल्याइएका १४ पोका माछाका भुरा आँधीखोलाको विभिन्न ७ स्थानमा छोडेको गाउँपालिका अध्यक्ष सुधिर कुमार पौडेलले बताउनुभयो । आयातित माछाका प्रजातिले गर्दा परम्परागत र स्थानीय माछा लोप हुने खतरा बढेपछि स्थानीय जातका माछाका भुरा छाडिएको गाउँपालिका अध्यक्ष सुधिर कुमार पौडेल बताउनुभयो । अध्यक्ष पौडेलले भन्नुभयो, “नदी, ताल र तलाउको जैविक विविधता कायम गर्नुका साथै पानी शुद्ध राख्न र पानीमा अक्सिजनको मात्रा बढाउन माछाको भूमिका महत्वपूणर् हुन्छ । त्यसैले जैविक विविधता कायम राख्नको लागि खोलामा माछाका भुरा छाडेका हौ ।”
खोलामा साना भुरा छोड्दा काग, बकुल्लो लगायतका विभिन्न चरा तथा सर्पले समेत खाने सम्भावना बढि हुनेभएकोल कम्तीमा पनि १० देखि १५ ग्रामका माछा छोडिएको कृषि प्राविधिक विवेक आचार्यले बताउनुभयो । बिभिन्न कारणबाट खोलामा माछा लोप हुदै जानथालेपछि ठेडे, हाँडे र गर्दी जातको माछाका भुरा जलाशयमा ल्याएर आँधीखोलामा छाडिएको गाउँपालिकाका सुचना अधिकृत रोशन लामिछानेले जानकारी दिनुभयो ।