वालिङ,२५ साउन– दहथुम बहुमुखी क्याम्पसमा अध्ययरनत आर्थिक अवस्था कमजोर भएका तथा जेहेन्दार विद्यार्थीलाई छात्रवृत्ति वितरण गरिएको छ ।

भीरकोट नगरपालिकाको सहयोगमा क्याम्पसले प्रत्येक वर्ष छात्रवृत्ति वितरण गर्दै आईरहेको छ । मंगलबार क्याम्पसमा एक कार्यक्रमको आयोजना गरी आर्थिक वर्ष २०७८÷०७९ अन्तरगत विद्यार्थीहरुलाई छात्रवृत्ति वितरण गरिएको हो । छात्रवृत्ति वितरण कार्यक्रममा बोल्दै भीरकोट नगरपालिकाका नगरप्रमुख गोविन्दकुमार कर्माचार्यले शिक्षाको विकास बिना नगरको विकास हुन नसक्ने भन्दै शैक्षिक गुणस्तर अभिवृद्धिका लागि नगरपालिका प्रतिवद्ध रहेको बताउनुभयो । छात्रवृत्ति कार्यक्रमले विद्यार्थीहरुलाई अध्ययनमा थप हौसला प्रदान गर्ने भन्दै शिक्षाको पहुँच हरेक नागरिकमा हुनुपर्ने नगरप्रमुख कर्माचार्यको भनाइ थियो ।

कार्यक्रममा क्याम्पसमा अन्ययनरत ५८ जना विद्यार्थीहरुलाई १ लाख ८२ हजार रुपैँया छात्रवृत्ति वितरण गरिएको क्याम्पस प्रमुख नेत्रनारायण रेग्मीले जानकारी दिनुभयो ।