चितवन,१० मङ्सिर- प्रधानमन्त्री एवं नेपाली कांग्रेसका सभापति शेरबहादुर देउवाले आफू एमाले अध्यक्ष केपी शर्मा ओलीसँगै जेलमा बसेको स्मरण गर्नुभएको छ ।

चितवनमा एमालेको १० औं राष्ट्रिय महाधिवेशनमा शुभकामना दिँदै देउवाले ओली र वामपन्थी नेता कार्यकर्तासँग आफूले जेल जीवन बिताएको बताउनुभयो ।

नेपालका राजनीतिक दलहरूले मिलेरै संविधानसभाबाट संविधान जारी गरेको स्मरण गराउँदै देउवाले राजनीतिक असहमतिहरूको समाधान संविधानप्रदत्त विधिबाट खोजिनुपर्ने बताउनुभयो ।

‘हाम्रा असहमतिहरुलाई संविधानले निर्धारण गरेका विधिबाटै टुंग्याउनुपर्दछ । त्यसलाई हामी सबैले स्वीकार्नुपर्दछ’, देउवाले भन्नुभयो । उहाँले कांग्रेस एमालेमा वैचारिक भिन्नता भएकैले अलग-अलग पार्टी रहेको भन्दै जनताका सवाल, राष्ट्रियता र राष्ट्रहितका विषयमा भने सहमति र सहकार्य हुनुपर्ने बताउनुभयो।