स्याङ्जा,७ भदौ– पूर्व मन्त्री पद्मा कुमारी अर्यालले उत्पादन मूलक कार्यमा लाग्न आग्रह गर्नुभएको छ । भूमि व्यवस्था सहकारी तथा गरिबी निवारण मन्त्रालयको २० लाख सहयोगमा कानुङ आँधीखोला बचत तथा ऋण सहकारी संस्था वालिङले आयोजना गरेको ढाकाको साडी तथा अन्य ढाका कपडा बुनाइ सम्बन्धी तीन महिने तालिमको समापन समारोहमा बोल्दै पूर्व मन्त्री अर्यालले हरेक व्यवसाय उत्पादनमूलक हुनुपर्ने बताउनुभयो ।

उत्पादन मूलक व्यावसायले मात्रै जनताको जीवन स्तरमा परिवर्तन ल्याउने पूर्व मन्त्री अर्यालको भनाइ थियो । न्यून आयस्तर भएका नागरिकहरुलाई सीपमूलक तालिमको माध्यमबाट उत्पादन मूलक व्यावसायमा रुपान्तरण गर्न सकिने उहाँले बताउनुभयो ।
सहकारीले यस अघि पनि ढाकाको खादा तथा पछेउरा बुन्ने र अचार बनाउने तालिम समेत सञ्चालन गरेको थियो ।

कार्यक्रममा गण्डकी प्रदेशका सांसद मोहन रेग्मी, एमालेका नेता हुमबहादुर गुरुङ, एमालेका नगर कमिटि अध्यक्ष राजेन्द्र डुम्रे, जिल्ला समन्वय समिति उपप्रमुख दिलिपकुमार बगाले, खगिसरा थापा, सोमुमाया राना, कृष्ण रानालगायतले बोल्नुभएको थियो संस्थाका अध्यक्ष उमेश दर्लामीको अध्यक्षतामा सम्पन्न कार्यक्रममा स्वागत रुपा थापा र सञ्चालन सचिव तेजबहादुर आलेले गर्नुभएको थियो ।