स्याङ्जा,१४ असार– आँधीखोला गाउँपालिकाले कृषकलाई फलफूलका बिरुवा वितरण गरेको छ । गाउँपालिकाले पालिका भीत्र रहेका सबै वडाका कृषकका साथै व्यावसायीक रुपमा कृषि फर्म सञ्चालन गर्दै आएका किसानलाई ५० प्रतिशत अनुदानमा कागती र सुन्तलाका बिरुवा वितरण गरेको हो ।
फलफूल खेति तर्फ किसानहरूलाई आर्कषण गर्ने उद्देश्यले ३ सय ५० जना किसानलाई ४ हजार ५ सय सुन्तलाका बिरुवा र २ हजार ५ सय कागती बिरुवा वितरण गरिएको गाउँपालिकाले जनाएको छ ।
गाउँपालिका अध्यक्ष सुधिर कुमार पौडेलले किसानलाई व्यावसायीक फलफूल खेतिबाट आर्थिक रूपमा सक्षम बनाउने योजना अनुसार बिरुवा वितरण गरिएको बताउनुभयो ।

व्यावसायीक कृषि पेशामा लाग्ने कृषकलाई गाउँपालिकाको तर्फबाट आवश्यक सहयोग गर्दै आएको र सहयोग निरन्तर रहने बताउनुभयो ।
कृषिसँगै पर्यटनको पनि प्रशस्त सम्भावना बोकेको आँधीखोला गाउँपालिकाको समृद्धिको लागि भर्खरै सम्पन्न भएको गाउँसभाले पनि कृषि र पर्यटनलाई पहिलो प्राथमिकतामा राखेर बजेट विनियोजन गरिएको अध्यक्ष पौडेलले बताउनुभयो ।
पालिका भीत्रको माटो परीक्षण गरेर सोही आधारमा बिरुवा बितरण गरिएको कृषि प्राविधिक विवेक आचार्यले बताउनुभयो ।
कृषि योग्य जमीनमा माटोको अम्लिय पन बढ्दै गएकोले माटोमा भएको अम्लिय पन घटाउनको लागि कृषकहरुलाई निशुल्क कृषि चुन वितरण गरिएको समेत गाउँपालिकाले जनाएको छ ।