वालिङ,२८ माघ–आँधीखोला सञ्चार सहकारी संस्थाा लिमिटेड द्वारा सञ्चालित रेडियो आँधीखोला १०५.४ मेगाहर्जको १५औँ साधारणसभा बुधबार सम्पन्न भएको छ । यही माघ २४ गतेबाट शुरु भएको साधारण सभाको बुधबार समापन भएको हो ।
रेडियो स्टेसनको कार्यालय वालिङ ८ घ्याङलीङमा गरिएको साधारण सभाको समापनका अवसरमा वालिङ नगरपालिकाका उपप्रमुख कल्पना तिवारीले स्याङ्जा जिल्लामै पहिलो संचार संस्थाको रुपमा स्थापित रेडियो आँधीखोलाले आम नागरिकहरुलाई सुसूचित गराउँदै आईरहेको बताउनुभयो । समयअनुकुल बढ्दो प्रविधिको युगमा रेडियोलाई पनि थप विस्तार गर्न आवश्यक रहेको भन्दै रेडियोसंगै अनलाइन खबर र टेलिभिजनमार्फत समेत संस्थाले आफ्नो क्षेत्र विस्तार गर्नुपर्ने तिवारीले बताउनुभयो । रेडियोको लागि आवश्यक सहयोग गर्न स्थानीय सरकार प्रतिवद्ध रहेको तिवारीको भनाइ थियो । कार्यक्रममा राष्ट्रिय जनमोर्चाका जिल्ला अध्यक्ष राजेन्द्रप्रसाद गैह्रे, रेडियोका निर्वतमान अध्यक्ष ध्रुवप्रसाद शर्मापंगेनी, रेडियोका संस्थापक अध्यक्ष रेशमलाल कोईराला लगायतले आआफ्नो भनाइ राख्नुभएको थियो भने कार्यक्रम रेडियोका अध्यक्ष नेत्रप्रसाद पाण्डेको अध्यक्षता र सचिव यमकान्त खनालको सञ्चालनले गर्नुभएको थियो । पाँच सय वार्ट क्षमताको रेडियो दैनिक १८ घण्टा प्रसारण हुदै आएको छ ।