वालिङ,२५ असोज– यही असोज २८ गतेदेखि कात्तिक ३ गतेसम्म गण्डकी प्रदेशको राजधानी पोखरामा हुने नवौँ राष्ट्रिय खेलकुद प्रतियोगिता अन्तर्गतको महिला फुटबल प्रतियोगिता स्याङ्जाको वालिङमा सञ्चालन हुने भएको छ ।

वालिङ नगरपालिका ८ स्थित मालेबगर खेल मैदानमा हुने प्रतियोगिताको तयारी अन्तिम चरणमा पुगेको जिल्ला खेलकुद विकास समिति स्याङ्जाका अध्यक्ष गिरीबहादुर गुरुङ (मोहन)ले जानकारी दिनुभयो ।

आयोजक राष्ट्रिय खेलकुद परिषदका अनुसार समय अपुग हुने भएकाले प्रतियोगिताको औपचारिक उद्घाटन २८ गते गरिने भएपनि यस अन्तर्गतको महिला क्रिकेट पोखरामा सञ्चालन भैसकेको छ । यसैगरी महिला फुटबल प्रतियोगिता समेत निर्धारित समय भन्दा एकदिन अघावै असोज २७ गतेबाट सञ्चालन हुने भएको छ ।

यही असोज २७ गते बिहीबारबाट प्रतियोगिता सुरु हुने भएपछि २६ गते बुधबारसम्ममा सबै खेलाडीहरु वालिङ आईसक्ने अध्यक्ष गुरुङले जानकारी दिनुभयो । गुरुङका अनुसार वालिङ आउने अफिसियल, प्रशिक्षक, खेलाडी सबैलाई होटल व्यवसायीहरूसँगको समन्वयमा आवासको व्यवस्थापन मिलाइएको छ ।

वालिङमा रहेको खेलमैदानमा जिल्ला समन्वय समितिको पहलमा वालिङ नगरपालिकासहित जिल्लाका ११ वटै पालिकाको सहयोगमा दुवो बिछ्याइएको छ । प्रतियोगिताका लागि खेलमैदानलाई ब्यवस्थित गर्ने, तारबार गर्नुका साथै खेलमैदानमा झण्डाहरू राख्ने लगायतका काम गरिएको छ ।