भरतपुर,१७ कात्तिक– चितवन क्षेत्र नम्बर ३ का स्वतन्त्र उमेदवार जगन्नाथ पौडेलले सबैको सल्लाहमा उम्मेद्वारी दिएको बताउनुभएको छ ।
उहाँले कसैले उमेदवारी फिर्ता लिनुस वा दिनुस भन्दैमा आफुले उमेदवारी फिर्ता नदिने बताउनुभएको हो । स्थानीय तहको निर्वाचनमा चितवनको भरतपुर महानगरपालिकामा मेयर पदमा भुईकटहर नामले चर्चामा आउनुभएका जगन्नाथ पौडेलले आसन्न प्रतिनिधि सभा निर्वाचनमा पनि चितवन क्षेत्र नम्बर ३ बाट उमेदवार बन्नुभएको छ ।

निर्वाचनको मिति नजिकिदै गर्दा आफ्नो प्रचारप्रसारलाई व्यापक बनाउदै लैजानुभएका पौडेलले आज (बिहीबार) पत्रकार सम्मेलन गर्दै चुनावी अभियान सुरु भएको जानकारी दिनुभएको छ । आज भरतपुरको गीतानगरमा भएको पत्रकार सम्मेलनमा बोल्दै पौडेलले इमानदार र निष्ठाको राजनीति गरेर आएको बताउदै स्थानीय तहमा पाएको जनमतबाट उत्साहित भएको उहाँले बताउनुभयो ।
चितवन क्षेत्र नम्बर ३ का जनता आफ्नो साथमा रहेको बताउदै । चितवन ३ मा बिकासका लागि मंसिर ४ गते सूर्यमुखी चुनाब चिन्हमा मतदान गरेर साथ दिन अनुरोध समेत गर्नुभयो ।