वालिङ,९ वैशाख– धवलागीरी प्राविधिक शिक्षालय लेते मुस्ताङको आयोजना र वैदेशिक रोजगार बोर्डको सचिवालयको आर्थिक सहयोग एवं आँधिखोला बहुप्राविधिक शिक्षालय वालिङ १३ को समन्वयमा बिहीबार देखि वालिङ नगरपालिका १० बर्तुङमा ब्युटिसियन तालीम सुरु गरिएको छ ।

सिपयुक्त जनता समृद्ध नेपाल भन्ने नारालाई आत्मसात गर्दै बेरोजगार महिलाहरुलाई सोरोजगार बनाउने योजना अनुसार १ सय ८० घण्टे ब्युटिसियन तालीम सञ्चालन गरिएको हो ।

तालीमको उद्घाटन समारोहमा बोल्दै आँधिखोला बहुप्राविधिक शिक्षालयका प्रमुख ई. शरद कोइरालाले तालीमले बेरोजगार महिला दिदीबहिनीहरुलाई उद्यमी बन्न सहयोग पुर्याउने बताउनुभयो । तालीममा सहभागि भएर सिकेका कुराहरुलाई ब्यवहारमा उतार्न सकेको खण्डमा आर्थिक उपार्जन गर्न सकिने भएकोले यस तर्फ ध्यान दिन समेत प्रमुख कोइरालाले आग्रह गर्नुभयो ।

तालीमको उद्घाटन स्थानीय समाजसेवी देविलाल सुवेदीले गर्नुभएको थियो उद्घाटन समारोहमा मञ्जु केसी, दिपक सुवेदी, प्रशिक्षक दुर्गा थापा लगायतले बोल्नुभएको थियो भने आँधिखोला बहुप्राविधिक शिक्षालयका लेखापाल अशोक गैह्रेको स्वागत मन्तब्य संगै सुरु भएको कार्यक्रमक आँधिखोला बहुप्राविधिक शिक्षालयका कर्मचारी टीका भट्टराईको सञ्चालन गर्नुभएको थियो । तालीममा २० जना महिलाको सहभागिता रहेको छ ।