वालिङ,१४ कात्तिक– राष्ट्रिय जनगणना २०७८ को लागि जिल्लामा खटिने गणकहरुलाई स्याङ्जामा तालीम दिन सुरु गरिएको छ । गणना गर्दा अपनाउनुपर्ने  गुणस्तरीय तथ्याङ्क संकलका बारेका जानकारी दिने उद्देश्यले तालिमको आयोजना गरिएको र शनिबारदेखि सुरु भएको तालीम मंगलबार सम्म सञ्चालन हुने जिल्ला जनगणना कार्यालय  स्याङ्जाले जनाएको छ ।

जिल्लाको ५ नगरपालिका र ६ गाउँपालिका गरी ११ पालिकालाई समेट्ने गरी ४ ठाउँमा सञ्चालित तालिममा  ३ सय ८५ जना गणक र नयाँ सुपरिवेक्षकको सहभागिता रहेको जिल्ला जनगणना अधिकारी सारदा शर्माले जानकारी दिनुभयो । सुपरिवेक्षकहरूले प्रारम्भिक लगत सङ्कलन गरी गणना क्षेत्र निर्धारण गरिएको र उक्त विवरण सहित गणकहरूलाई मूल गणना गर्न कात्तिक २५ गतेदेखि मङ्सिर ९ गते सम्मका लागि घरदैलोमा खटाइने शर्माले बताउनुभयो ।

‘मेरो गणना, मेरो सहभागिता’ भन्ने नाराका साथ १२औँ राष्ट्रिय जनगणना सञ्चालन हुदै छ ।

एकजना गणकलाई १ सय ८०  देखी २ सय सम्म घरधुरी रहने गरी गणना क्षेत्र तोकेर गणकलाई खटाइने शर्माले जानकारी दिनुभयो ।

अब हुने गणना दोस्रो चरणको जनगणना हो । जसमा गणकहरूमार्फत प्रत्येक घर परिवारमा पुगी प्रश्नावलीमार्फत पारिवारिक विवरण तथा व्यक्तिको जन्म, मृत्यु, बसाइसराइ लगायत विवरणहरू सङ्कलन गरिनेछ ।

दोस्रो चरणको गणना अन्तर्गत नै सबै स्थानीय तहका प्रत्येक वडा कार्यालयबाट वडा स्तर सामुदायिक प्रश्नावलीमार्फत वडाको आधारभूत स्रोत साधन, पहुँच, क्षमता, पूर्वाधार र विपद्सम्बन्धी विवरण पनि सङ्कलन सुपरिवेक्षक मार्फत गरिने छ ।